मुंबई : मुंबई महापालिकेत शिवसेनेच्या गटनेतेपदी तरुण नगरसेवक आणि एकेकाळी माजी मंत्री आदित्य ठाकरे यांच्या जवळ असलेले अमेय घोले यांची निवड करण्यात आली आहे. शिवसेनेचे महापालिकेत २९ नगरसेवक निवडून आलेले असून हे दोन्ही पक्ष आपल्या पक्षाची नोंदणी एकत्रपणे करतात की स्वतंत्र याबाबत चर्चा सुरू असतानाच शिवसेनेने आपला गटनेता निवडून या चर्चेला पूर्णविराम दिला आहे.
मुंबई महापालिकेत भाजपच्या गटनेते पदी गणेश खणकर यांची निवड करण्यात आल्यानंतर शिवसेनेने आपला गटनेता निवडला. शिवसेनेतील सर्वात तरुण आणि अभ्यासू अशी त्यांची ख्याती आहेत. भाजपचे ८९ तर शिवसेनेचे २९ नगरसेवक निवडून आलेले असून यासर्व नगरसेवकांची कोकण विभागीय आयुक्त कार्यालयात कार्यालयात नोंदणी झाली नवहती. त्यामुळे स्वीकृत नगरसेवक आणि वैधानिक तसेच विशेष समित्यांमध्ये संख्याबळ वाढवण्याच्या दृष्टिकोनातून हे दोन्ही पक्ष गट करून एकत्र नोंदणी करतील अशी चर्चा होती. पण दोन्ही पक्षाचे स्वतंत्र गटनेते निवडले गेले आहेत.
अमेय घोले हे प्रभाग १७८मधून निवडून आले असून त्यांची गटनेतेपदी निवड झाल्यानंतर पक्षाच्या सरचिटणीस आणि माजी खासदार राहुल शेवाळे,पक्षाच्या प्रवक्त्या शीतल म्हात्रे यांनी त्यांचे अभिनंदन केले. गटनेते निवडीनंतर भाजप आणि शिवसेना पक्षाच्या नेत्यांनी महापालिका आयुक्त डॉ भूषण गगराणी यांची भेट घेतली. यावेळी भाजपचे मुंबई अध्यक्ष अमित साटम, माजी खासदार मनोज कोटक आदी नेते उपस्थित होते. त्यानंतर भाजपसोबतच सोमवारी शिवसेना नगरसेवकांची नोंदणी केली जात आहे.