बारामती : राज्याच्या राजकीय वर्तुळातून एक अत्यंत भीषण आणि हृदयद्रावक बातमी समोर येत आहे. जिल्हा परिषद निवडणुकीच्या प्रचारासाठी बारामती दौऱ्यावर असताना उपमुख्यमंत्री अजित पवार यांच्या विमानाला लँडिंग दरम्यान भीषण अपघात झाला. नागरी विमान वाहतूक संचालनालयाने (DGCA) दिलेल्या प्राथमिक माहितीनुसार, या दुर्दैवी घटनेत विमानातील सर्व ६ प्रवाशांचा मृत्यू झाला आहे.
आज सकाळी जिल्हा परिषद आणि पंचायत समितीच्या निवडणुकीच्या प्रचाराचा धडाका सुरू करण्यासाठी उपमुख्यमंत्री अजित पवार बारामतीत दाखल होणार होते. विमान धावपट्टीवर उतरत असताना तांत्रिक बिघाड झाल्याने हा अपघात झाला. सुरुवातीला उपमुख्यमंत्री गंभीर जखमी असून त्यांना तातडीने स्थानिक रुग्णालयात दाखल करण्यात आल्याच्या बातम्या येत होत्या. मात्र, काही वेळातच DGCA कडून अधिकृत दुजोरा मिळाला की, अपघात इतका भीषण होता की विमानातील सहाही जणांनी आपले प्राण गमावले आहेत.
प्रशासकीय यंत्रणा घटनास्थळी दाखल
अपघाताची माहिती मिळताच जिल्हा प्रशासन, पोलीस यंत्रणा आणि मदतकार्य पथके घटनास्थळी रवाना झाली. विमानाचा चक्काचूर झाला असून संपूर्ण परिसरात शोककळा पसरली आहे. या घटनेमुळे राज्यावरील निवडणूक प्रचाराचे सावट अधिकच गडद झाले असून, सर्व नियोजित सभा रद्द करण्यात आल्या आहेत.