सवाई माधोपूर : राजस्थानमधील जगप्रसिद्ध रणथंभोर टायगर रिझर्व्हमध्ये शुक्रवारी संध्याकाळी निसर्गाचा एक अत्यंत दुर्मीळ आणि थक्क करणारा आविष्कार पाहायला मिळाला. जंगलाचा राजा समजला जाणारा वाघ आणि रागीट स्वभावाचे अस्वल जेव्हा एकमेकांसमोर उभे ठाकले, तेव्हा पर्यटकांच्या काळजाचा ठोका चुकला. मात्र, या लढाईचा शेवट ज्या पद्धतीने झाला, ते पाहून निसर्गप्रेमी अवाक झाले आहेत.
रणथंभोरमधील व्हायरल व्हिडिओमधली घटना
रणथंभोरच्या झोन ३ आणि ४ च्या सीमेवर प्रसिद्ध वाघिण 'रिद्धी'चा मादी बछडा आपल्या भागात वावरत असताना अचानक एका मोठ्या अस्वलाशी (स्लॉथ बेअर) त्याची गाठ पडली. अस्वलाने वाघाच्या बछड्याला पाहताच अत्यंत आक्रमक पवित्रा घेतला. दोन्ही प्राण्यांनी एकमेकांकडे पाहत डरकाळ्या फोडत आव्हान देण्यास सुरुवात केली. अस्वलाचा भयानक हुंकार आणि त्याचे रौद्र रूप पाहून काही क्षणातच वाघाच्या बछड्याला आपल्या मर्यादेची जाणीव झाली. अस्वलाच्या ताकदीसमोर आपण कमी पडत असल्याचे लक्षात येताच, बछड्याने चक्क गवतात बसून आत्मसमर्पण (Surrender) केले. वाघासारख्या शिकारी प्राण्याने अस्वलासमोर अशा प्रकारे माघार घेतल्याने एक मोठा रक्तपात टळला.
पर्यटकांच्या कॅमेऱ्यात कैद झाला 'थरार'
रणथंभोरमध्ये वाघ आणि अस्वलाचा असा समोरासमोर मुकाबला होणे अत्यंत दुर्मीळ मानले जाते. या रोमांचक दृश्यामुळे सफारीसाठी आलेले पर्यटक रोमांचित झाले आणि त्यांनी हा क्षण आपल्या कॅमेऱ्यात कैद केला. सध्या हा व्हिडिओ सोशल मीडियावर तुफान व्हायरल होत आहे. या घटनेतून हे सिद्ध झाले की, जंगलातील शिकारी प्राणी देखील प्रसंगावधान राखून स्वतःचा जीव वाचवण्यासाठी माघार घेतात.
रणथंभोरचा 'रिद्धी' परिवार आणि अस्वलांचा दरारा
२०२५-२०२६ च्या हिवाळी हंगामात रणथंभोरमध्ये वाघांचे दर्शन (Sighting) मोठ्या प्रमाणावर होत आहे. वाघिण रिद्धी सध्या आपल्या बछड्यांसह या परिसरात अधिराज्य गाजवत आहे. जानेवारी २०२६ मध्येही तिचा एक बछडा किल्ल्याच्या पार्किंग परिसरात दिसला होता. विशेष म्हणजे, रणथंभोरमध्ये अस्वलांचे धैर्य यापूर्वीही चर्चेचा विषय ठरले आहे. प्रौढ अस्वलाची ताकद आणि नखे वाघासाठीही जीवघेणी ठरू शकतात, हे ओळखूनच कदाचित लहान बछड्याने संघर्ष टाळणे पसंत केले.