भाईंदर : मीरा–भाईंदर महानगरपालिकेच्या नव्या सभागृहात यावेळी तब्बल ४२ नवीन चेहरे दिसणार असून, त्यामध्ये भाजपाचे ३२ आणि काँग्रेसचे १० नगरसेवक आहेत. तसेच एकूण ५१ महिला नगरसेविका निवडून आल्याने सभागृहात यंदा महिलांचे वर्चस्व प्रकर्षाने जाणवणार आहे. ९५ सदस्यांच्या महापालिकेसाठी झालेल्या निवडणुकीत भाजपला ७८, काँग्रेसला १३, शिवसेनेला ३ तर अपक्षाला १ जागा मिळाली आहे. या निवडणुकीत भाजप व काँग्रेस या दोन्ही पक्षांनी नवीन, तरुण आणि उच्चशिक्षित उमेदवारांना संधी दिली होती.
या धोरणाचा फायदा दोन्ही पक्षांना झाला असून, सर्व नवीन चेहरे विजयी ठरले आहेत.
भाजपाचे ३२ तरुण व उच्चशिक्षित उमेदवार प्रथमच सभागृहात प्रवेश करणार आहेत. काँग्रेसनेही अनुभवी नगरसेवकांना डावलत १० नवीन उच्चशिक्षित उमेदवारांना उमेदवारी दिली होती आणि ते सर्व विजयी झाले. त्यामुळे यावेळी महापालिका सभागृहात तरुणाईचा प्रभाव दिसणार आहे.
महापालिकेतील २४ प्रभागांपैकी २३ प्रभागांत प्रत्येकी चार, तर एका प्रभागात तीन सदस्यांची निवड झाली आहे. ५० टक्के महिला आरक्षणानुसार ४८ जागा महिलांसाठी राखीव होत्या. मात्र, तीन प्रभागांत भाजपाने प्रत्येकी दोनऐवजी तीन महिलांना संधी दिली आणि त्या निवडून आल्याने महिला नगरसेविकांची संख्या ५१ वर पोहोचली आहे.
यामध्ये माजी महापौर निर्मला सावळे, डिंपल मेहता आणि ज्योत्स्ना हसनाळे यांचाही समावेश असल्याने, यावेळी मीरा–भाईंदर महापालिका सभागृहात महिलाराज पाहायला मिळणार आहे.