कणकवली : गेल्या काही दिवसांपासून सुरू असलेल्या नाट्यमय घडामोडींनंतर आज रविवार ४ जानेवारी रोजी माजी मुख्यमंत्री आणि कोकणचा बुलंद आवाज खासदार नारायण राणे यांचे सिंधुदुर्ग जिल्ह्यात प्रथमच आगमन होत आहे. विशेष म्हणजे, नगरपरिषद निवडणुकांच्या पार्श्वभूमीवर निर्माण झालेल्या राजकीय धुरळ्यानंतर खा. नारायण राणे, पालकमंत्री नितेश राणे आणि शिवसेना आमदार निलेश राणे हे संपूर्ण 'राणे कुटुंब' एकत्रितपणे जिल्ह्यात येत असल्याने समर्थकांमध्ये प्रचंड उत्साहाचे वातावरण आहे.
गेल्या काही तासांपासून जिल्ह्यातील भाजप पदाधिकारी आणि हजारो कार्यकर्त्यांच्या व्हॉट्सॲप स्टेटसवर "मी राणे समर्थक", "एकच ना रा", "आमची ओळख राणे कुटुंबिय" आणि "जय नारायण" अशा आशयाचे पोस्टर झळकत आहेत. २००५ मध्ये नारायण राणे यांनी शिवसेना सोडल्यानंतर जी भावनिक लाट कार्यकर्त्यांमध्ये होती, तसेच वातावरण पुन्हा एकदा दिसत आहे.
राणे समर्थकांनी स्वागतासाठी जय्यत तयारी केली असून, उद्या बांदा ते कणकवली अशी भव्य रॅली काढण्यात येणार आहे. हजारो गाड्यांचा ताफा या रॅलीत सहभागी होण्याची शक्यता असून, बांदा येथे राणे कुटुंबियांचे जोरदार स्वागत होईल. त्यानंतर ही रॅली कणकवलीकडे कूच करेल. सायंकाळी ५ वाजता कणकवली उपजिल्हा रुग्णालयासमोरील पटांगणावर कार्यकर्त्यांचा भव्य मेळावा आयोजित करण्यात आला आहे. या सभेत खा. नारायण राणे काय भूमिका मांडणार, याकडे अवघ्या महाराष्ट्राचे लक्ष लागले आहे.