सीरिया : सीरियामध्ये अमेरिकन सैन्यावर झालेल्या हल्ल्यानंतर अमेरिकेने मोठी लष्करी कारवाई करत इस्लामिक स्टेटच्या ठिकाणांवर जोरदार हवाई हल्ले केले आहेत. अमेरिकन संरक्षण मंत्रालयाने दिलेल्या माहितीनुसार, ‘ऑपरेशन हॉकआय’ अंतर्गत सीरियातील दहशतवाद्यांच्या सुमारे ७० ठिकाणांवर बॉम्बहल्ले करण्यात आले.
गेल्या आठवड्यात मध्य सीरियातील पालमीरा भागात अमेरिका आणि सहयोगी दलांवर हल्ला झाला होता. या हल्ल्यात दोन अमेरिकन सैनिक आणि एक स्थानिक अनुवादकाचा मृत्यू झाला, तर तीन अमेरिकन सैनिक जखमी झाले होते. या हल्ल्याला प्रत्युत्तर म्हणून ही कारवाई करण्यात आल्याचे अमेरिकेचे संरक्षण सचिव पीट हेगसेथ यांनी स्पष्ट केले आहे.
हेगसेथ यांनी सांगितले की, ही कारवाई इसिसच्या थेट ठिकाणांवर केंद्रित होती. ही नवीन युद्धाची सुरुवात नसून अमेरिकन सैनिकांवर झालेल्या हल्ल्याचा ठोस बदला आहे. जगात कुठेही अमेरिकन नागरिक किंवा सैन्यावर हल्ला झाला, तर अमेरिका हल्लेखोरांचा शोध घेऊन त्यांचा खात्मा करेल, असा स्पष्ट इशाराही त्यांनी दिला.
अमेरिकन अधिकाऱ्यांच्या माहितीनुसार, मध्य सीरियामध्ये करण्यात आलेली ही हवाई कारवाई अत्यंत अचूक आणि व्यापक होती. इसिसशी संबंधित डझनभर तळ, साठवणूक केंद्रे आणि हालचालींच्या ठिकाणांना लक्ष्य करण्यात आले. या कारवाईत मोठ्या प्रमाणात दहशतवाद्यांचे नुकसान झाल्याचा दावा करण्यात येत आहे.
दरम्यान, राष्ट्राध्यक्ष डोनाल्ड ट्रम्प यांनीही या कारवाईवर प्रतिक्रिया दिली आहे. इसिसकडून अमेरिकन सैनिकांची क्रूर हत्या झाल्यानंतर आता प्रत्युत्तर कारवाई सुरू झाल्याचे ट्रम्प यांनी सांगितले. शहीद सैनिकांना लष्करी सन्मानानं मायदेशी आणण्यात आले असून त्यांच्या बलिदानाचा बदला घेण्यासाठी ही कारवाई करण्यात येत असल्याचे त्यांनी स्पष्ट केले. या हवाई हल्ल्यांमुळे सीरियातील परिस्थिती आणखी तणावपूर्ण होण्याची शक्यता असून मध्यपूर्वेत घडामोडींवर आंतरराष्ट्रीय स्तरावर लक्ष ठेवले जात आहे.
