गोंदिया: महाराष्ट्रात मागील अनेक दिवसांपासून नक्षल संघटनेमधून आत्मसमर्पणाचा ओघ मोठ्या प्रमाणात वाढला आहे. नक्षलवादी संघटनेच्या महाराष्ट्र-मध्यप्रदेश-छत्तीसगढ (एमएमसी) चा विशेष विभागीय समिती सदस्य आणि प्रवक्ता विकास नागपुरे ऊर्फ अनंतसह ११ जहाल नक्षलवाद्यांनी आत्मसमर्पण केले आहे. शुक्रवारी (२८ नोव्हेंबर) गोंदिया पोलिसांसमोर या नक्षलवाद्यांनी आत्मसमर्पण केले. आत्मसमर्पित नक्षलवाद्यांवर महाराष्ट्र शासनाचे एकूण ८९ लाख रुपयांचे बक्षीस होते.
महाराष्ट्र-मध्यप्रदेश-छत्तीसगढ अर्थात 'एमएमसी' या नक्षलवादी संघटनेचा प्रवक्ता अनंतने २७ नोव्हेंबरला प्रसिद्धी पत्रक जारी करत १ जानेवारी २०२६ रोजी संपूर्ण समिती आत्मसमर्पण करणार असल्याचे स्पष्ट केले होते. यानंतर दुसऱ्याच दिवशी संध्याकाळी अनंतसह ११ नक्षलवाद्यांनी गोंदिया पोलिसांसमोर शरणागती पत्करली. नक्षलवादाविरोधात हे खूप मोठे यश मानावे लागेल.
प्रसिद्धी पत्रकात अनंत याने सांगितले की, समितीतील इतर सदस्यांपर्यंत संदेश पोहोचवण्यासाठी १ जानेवारी २०२६ पर्यंत वेळ हवा आहे. भूपती आणि चंद्रन्ना यांच्यासारख्या मोठ्या नेत्यांनी शस्त्रे खाली ठेवल्याने आत्मसमर्पणाशिवाय पर्याय शिल्लक नाही. १ जानेवारीपर्यंत सर्व प्रक्रिया पूर्ण करून शस्त्रे खाली ठेवण्यात येतील. तसेच, या काळात कोणतीही हिंसा किंवा पीएलजीए सप्ताह पाळला जाणार नाही, असे आश्वासनही त्याने दिले.
नक्षलवादी संघटनेत दंडकारण्य आणि एमएमसी समितीचे मोठे महत्त्व आहे. एमएमसीमधील भूपती आणि चंद्रन्ना या मोठ्या नेत्यांनी शस्त्रे खाली ठेवल्यामुळे हळूहळू सर्वजण आत्मसमर्पणाकडे वळले आहे. त्यात ११ माओवाद्यांचे एकत्रिक आत्मसमर्पण आणि अनंतने सांगितलेले संपूर्ण एमएमसी संघटनेची लवकरच होणारी शरणागती हे नक्षलवाद समाप्तीच्या दिशेने महत्त्वाचे पाऊल आहे.