मुंबई: मध्य रेल्वेच्या मुंबई विभागातील लोणावळा - बीव्हीटी यार्ड, तसेच कल्याण – लोणावळा विभागातील अप यार्डमध्ये प्री नॉन-इंटरलॉकिंग अणि नॉन-इंटरलॉकिंग कामासाठी २६ नोव्हेंबर ते ६ डिसेंबर या कालावधीत विशेष ब्लॉक घेण्यात येणार आहे. या ब्लॉकमुळे पुणे आणि मुंबई दरम्यान प्रवास करणाऱ्या रेल्वे गाड्यांच्या वेळापत्रकावर मोठा परिणाम होणार आहे. ज्यात मुंबई ते पुण्यादरम्यान चालणाऱ्या एक्सप्रेस गाड्यांप्रमाणेच लोकलचे वेळापत्रकसुद्धा बिघडणार असल्याने दररोज मुंबई ते पुणे ये-जा करणाऱ्यांना प्रवासामध्ये अडथळा निर्माण होणार आहे.
२६ नोव्हेंबर ते ६ डिसेंबर दरम्यान वेळापत्रकातील मुख्य बदल
- पुणे-मुंबई इंटरसिटी आणि पुणे-मुंबई इंद्रायणी एक्स्प्रेस या गाड्यांना २८ आणि २९ नोव्हेंबर रोजी छत्रपती शिवाजी महाराज टर्मिनस येथे पोहोचण्यास १० ते १५ मिनिटांचा उशीर होण्याची शक्यता आहे.
-२६ नोव्हेंबर ते ६ डिसेंबर या कालावधीत धावणाऱ्या पुणे-लोणावळा लोकल गाड्या लोणावळ्यापर्यंत न जाता तळेगाव येथे शॉर्ट टर्मिनेट केल्या जातील.
- छत्रपती शिवाजी महाराज टर्मिनसवरून पुणे मार्गे चेन्नई आणि हैदराबादला जाण्याऱ्या एक्स्प्रेसला लोणावळ्यापर्यंत पोहोचण्यास १० ते १५ मिनिटांचा उशीर होण्याची शक्यता आहे.
- २८ आणि २९ नोव्हेंबर रोजी अप (मुंबईकडे जाणारा) आणि डाउन (पुण्याकडे येणारा) या दोन्ही मार्गांवर सकाळी ११.२५ ते संध्याकाळी ६ वाजेपर्यंत पॉवर ब्लॉक असणार आहे.
एक्स्प्रेस गाड्यांना उशीर!
पुणे-छत्रपती शिवाजी महाराज टर्मिनस डेक्कन एक्स्प्रेस: १ तास १५ मिनिटं उशीराने
कोल्हापूर-छत्रपती शिवाजी महाराज टर्मिनस कोयना एक्स्प्रेस: ४० मिनिटं उशीराने
बंगळुरू-छत्रपती शिवाजी महाराज टर्मिनस उद्यान एक्स्प्रेस: ३० मिनिटं उशीराने
दौंड-इंदूर एक्स्प्रेस: १ तास उशीराने
दरम्यान, रेल्वे प्रशासनाने प्रवाशांना विनंती केली आहे की, त्यांनी या ११ दिवसांच्या कालावधीत रेल्वेने प्रवास करण्यापूर्वी आपल्या गाडीच्या वेळापत्रकाची सद्यस्थिती तपासून घ्यावी.