मुंबई : महाराष्ट्राचे अतिरिक्त पोलीस महासंचालक विश्वास नांगरे पाटील यांना मातृशोक झाला आहे. त्यांच्या मातोश्री मंगल नारायण नांगरे पाटील यांचे वृद्धापकाळाने निधन झाले. सालीतील शिराळा मतदारसंघाचे आमदार सत्यजित देशमुख यांनी सोशल मीडियावरून ही माहिती दिली.
देशमुख यांनी आपल्या पोस्टमध्ये मंगल नांगरे पाटील यांच्या शांत स्वभावाचे, त्यांच्याकडून मिळालेल्या संस्कारांचे आणि त्यांच्या निस्वार्थ मायाळूपणाचे स्मरण केले. त्यांनी लिहिले की, आज मन जड झाले आहे; विश्वास नांगरे पाटील आणि विकास नांगरे पाटील यांच्या मातोश्रींच्या निधनाने एक भावनिक पोकळी निर्माण झाली आहे.
सत्यजित देशमुख यांनी पुढे नमूद केले की, सकाळपासून मन अस्वस्थ होतं. कोकरूडमध्ये जाऊन काकींना भेटण्याचा योग आला, मात्र त्यांची प्रकृती अत्यंत नाजूक होती. त्यांना भेटताना मला माझ्या आईची आठवण झाली. शिराळ्याला पोहोचताच त्यांच्या निधनाची बातमी कळली आणि मन सुन्न झाले. काकींचा शांत स्वभाव, त्यांची माया आणि संस्कारांची शिदोरी हे सर्व आयुष्यभर स्मरणात राहील.
देशमुख यांनी ईश्वर त्यांच्या आत्म्यास चिरशांती देवो आणि या कठीण प्रसंगातून संपूर्ण कुटुंबाला धीर, आधार आणि सामर्थ्य मिळो, अशी प्रार्थना व्यक्त केली.