नवी दिल्ली : देशाची राजधानी दिल्ली (Delhi) सोमवारी सायंकाळी एका मोठ्या स्फोटाने हादरली. येथील ऐतिहासिक लाल किल्ला मेट्रो स्टेशनच्या (Red Fort Metro Station) गेट क्रमांक एकजवळील पार्किंगमध्ये उभ्या असलेल्या एका कारमध्ये सायंकाळी साधारण ६ वाजून ४५ मिनिटांनी हा शक्तिशाली स्फोट झाला. या भीषण घटनेमुळे परिसरात मोठी खळबळ उडाली असून दिल्लीत हाय अलर्ट (High Alert) जारी करण्यात आला आहे.
स्फोटाची तीव्रता इतकी मोठी होती की, स्फोट झालेल्या कारसह आजूबाजूच्या आणखी तीन गाड्यांना लागलीच आग लागली आणि परिसर धुराने व्यापला. प्राथमिक माहितीनुसार, या दुर्घटनेत किमान आठ जणांचा मृत्यू झाल्याची तर १५ जण जखमी झाल्याची भीती व्यक्त होत आहे. जखमी आणि मृतांचा आकडा वाढण्याची शक्यता वर्तवण्यात येत आहे. स्फोटानंतर तात्काळ अग्निशमन दलाच्या (Fire Brigade) सुमारे सात गाड्या घटनास्थळी दाखल झाल्या आणि त्यांनी युद्धपातळीवर मदतकार्य सुरू केले.
ज्या ठिकाणी हा स्फोट झाला, ते ठिकाण लाल किल्ल्यापासून (Red Fort) केवळ ८०० मीटर अंतरावर आहे आणि हा भाग उच्च सुरक्षा (High Security Zone) असलेला तसेच नेहमी गजबजलेला असतो. विशेषतः सायंकाळच्या वेळी येथे पर्यटकांची आणि नागरिकांची मोठी गर्दी असते. नेमक्या याच वेळी हा स्फोट झाला.
या घटनेनंतर, खबरदारी म्हणून लाल किल्ला परिसर तातडीने रिकामा करण्यात आला असून, दिल्ली पोलीस आणि सुरक्षा यंत्रणांनी परिसराचा ताबा घेतला आहे. स्फोटाचे नेमके स्वरूप आणि कारण काय आहे, याचा तपास करण्यासाठी राष्ट्रीय सुरक्षा दलाचे (NSG) वरिष्ठ अधिकारी घटनास्थळी पोहोचले आहेत.
गेल्या चार दिवसांत, म्हणजेच ७ नोव्हेंबर ते १० नोव्हेंबर या दरम्यान दिल्ली पोलिसांनी मोठी कारवाई करत आयसिसच्या चार दहशतवाद्यांना (ISIS Terrorists) मोठ्या प्रमाणात स्फोटकांसह अटक केली आहे. याच पार्श्वभूमीवर लाल किल्ल्याजवळ झालेल्या या स्फोटाकडे अत्यंत गंभीरपणे आणि दहशतवादी कटाच्या संशयाने पाहिले जात आहे. सुरक्षा यंत्रणा या सर्व शक्यतांच्या आधारावर कसून तपास करत आहेत. स्फोटामागील खरे कारण आणि सूत्रधार लवकरच समोर येतील, अशी अपेक्षा आहे.