Delhi Special Cell कडून कुर्ल्यातील १८ वर्षीय तरुणाला अटक; पोलिसांनी उधळला दहशतवादी हल्ल्याचा कट

- टॉय कारच्या माध्यमातून दिल्लीत स्फोट घडवण्याचा कट

दिल्ली पोलीस स्पेशल सेलकडून एक मोठी कारवाई करण्यात आली आहे. दिल्लीत दहशतवादी हल्ल्याचा घडवून आणण्याचा कट रचल्याने त्यांनी कुर्ला मधून एका १८ वर्षीय मुलाला अटक केली आहे.

दिल्लीत टॉय कारच्या माध्यमातून घातपात घडवण्याचा कट उधळण्यात आला असून या प्रकरणात मुंबईतील कुर्ला येथून १८ वर्षीय हमास सिद्दीकीला अटक करण्यात आली आहे. दिल्ली स्पेशल सेल आणि महाराष्ट्र एटीएसने संयुक्त कारवाई करत ही अटक केली.

अटक झालेल्या हमासच्या वडिलांनी, जलालुद्दीन सिद्दीकी यांनी घटनेबाबत माहिती देताना सांगितले की, ३ तारखेला पहाटे साडेचार ते पाचच्या सुमारास १८ ते २० अधिकारी त्यांच्या घरी आले आणि हमासला ताब्यात घेऊन गेले. “माझा मुलगा नुकताच १८ वर्षांचा झाला आहे. तो एक विद्यार्थी आहे, गुन्हेगार नाही. तो अभ्यासू असून दहावीत त्याला ७६ टक्के गुण मिळाले होते,” असे त्यांनी सांगितले.

गेल्या दोन-तीन महिन्यांत ऑनलाइन गेम खेळताना त्याचा काही लोकांशी संपर्क झाला असावा, अशी माहिती अधिकाऱ्यांनी दिल्याचेही त्यांनी नमूद केले. जागतिक स्तरावर खेळल्या जाणाऱ्या ऑनलाइन गेम्समधूनच हे संपर्क जुळले असावेत, असा अंदाज अधिकाऱ्यांनी व्यक्त केला असल्याचे ते म्हणाले.

हमास काही संशयितांच्या संपर्कात होता आणि दिल्लीत घातपाताचा कट रचण्यात त्याचा सहभाग असल्याचा दावा तपास यंत्रणांकडून करण्यात येत आहे. मात्र, याबाबत बोलताना त्याच्या वडिलांनी कोणतीही संशयास्पद हालचाल दिसून न आल्याचे स्पष्ट केले.

“गेल्या काही महिन्यांत त्याचे फोन कॉल्स वाढले होते. त्याची आईनेही याकडे लक्ष वेधले होते. तो बराच वेळ फोनवर बोलत असे, कधी बाहेर जाऊनही बोलत होता. आम्ही त्याला याबाबत विचारणा केली आणि अभ्यासावर लक्ष देण्याचा सल्ला दिला. त्यानेही होकार दिला होता. पण याशिवाय कोणतीही संशयास्पद कृती आम्हाला आढळली नाही,” असे जलालुद्दीन यांनी सांगितले.

तपास यंत्रणांच्या दाव्यांना त्यांनी फेटाळून लावत, “ही सर्व माहिती एजन्सीकडून पसरवली जात आहे. माझा मुलगा असा नाही,” असेही त्यांनी ठामपणे म्हटले.