पुणे : महाराष्ट्र नवनिर्माण सेनेचे (मनसे) अध्यक्ष राज ठाकरे आज पुण्यातील पदाधिकाऱ्यांच्या बैठकीत कमालीचे संतप्त झाल्याचे पाहायला मिळाले. कामाचा निरुत्साह आणि अपेक्षित कामगिरी न दिसल्यामुळे त्यांनी शाखाध्यक्ष आणि पदाधिकाऱ्यांची जोरदार कानउघडणी केली. "जर काम करायची इच्छा नसेल, तर लगेच पद सोडा," अशा कठोर शब्दांत राज ठाकरे यांनी आपल्या कार्यकर्त्यांना फटकारले.
राज ठाकरे यांनी बैठकीत अनेक महत्त्वाच्या मुद्द्यांवर पदाधिकाऱ्यांकडून माहिती घेतली. "इतके दिवस तुम्ही काय काम केले, ते दाखवा. मतदार याद्या पूर्ण का केल्या नाहीत?" असा थेट आणि रोखठोक प्रश्न त्यांनी विचारला. बूथ पातळीवरील कामे, पक्ष बांधणी आणि पक्ष संघटना यांसारख्या विषयांवर पदाधिकाऱ्यांकडून समाधानकारक उत्तर न मिळाल्याने राज ठाकरे यांनी तीव्र नाराजी व्यक्त केली.
पदाधिकाऱ्यांच्या कामाच्या या थंड प्रतिसादामुळे राज ठाकरे यांचा संताप अनावर झाला. त्यांनी थेट आदेश देत, ज्यांनी काम केले नाही, अशा सर्व पदाधिकाऱ्यांना त्वरित काढून टाकण्याचे निर्देश दिले आहेत. या नाराजीनंतर राज ठाकरे यांनी बैठक लवकर संपवून लगेच निघून जाणे पसंत केले. राज ठाकरे पदाधिकाऱ्यांच्या कार्यक्षमतेवर किती गंभीर आहेत, हे या घटनेतून स्पष्ट झाले आहे.