मुंबई : दिग्दर्शक लक्ष्मण उतेकर दिग्दर्शित ‘छावा’ सिनेमाला चाहत्यांनी भरभरुन प्रेम दिलं. छत्रपती संभाजी महाराज यांच्या शौर्यावर आधारित ‘छावा’ सिनेमाने बॉक्स ऑफिसवर देखील अनेक मोठे रेकॉर्ड मोडले. आता ‘छावा’ सिनेमाच्या यशानंतर लक्ष्मण उतेकर प्रसिद्ध लावणी नृत्यांगनेचं खडतर आयुष्य पडद्यावर दाखवण्याचा प्रयत्न करणार आहेत. सिनेमात अभिनेत्री श्रद्धा कपूर मुख्य भूमिकेत दिसणार असून एका मराठी मुलीची भूमिका साकारणार आहे. सध्या सर्वत्र लक्ष्मण उतेकर यांच्या आगामी सिनेमाची चर्चा सुरु आहे.
मिळालेल्या माहितीनुसार, श्रद्धा कपूर सिनेमात महाराष्ट्रातील प्रसिद्ध आणि लोकप्रिय नृत्यांगना आणि ‘लावणी सम्राज्ञी’ म्हणून प्रसिद्ध, लोकप्रिय असलेल्या विठाबाई भाऊ मांग नारायणगावकर यांच्या भूमिकेत दिसणार आहे. यावर निर्मात्यांकडून अद्याप अधिकृत माहिती समोर आली नाही. पण जर हे खरं ठरलं तर श्रद्धाच्या कारकिर्दीतील ही सर्वात आव्हानात्मक भूमिका ठरू शकते. ‘तमाशा: विठाबाईचा आयुष्याचा’ ही प्रसिद्ध मराठी कादंबरी विठाबाईंच्या जीवनाची कहाणी सांगते.
विठाबाई भाऊ मांग नारायणगावकर या फक्त एक लावणी नृत्यांगना नव्हत्या तर, त्यांनी आयुष्यात अनेक चढ – उतारांचा सामना केला आहे. विठाबाई यांच्या आयुष्यात अनेक अडचणी आल्या. गरिबी, समाजाच्या रूढीवादी विचारसरणीला आणि लावणी कलाकारांवरील लोकांच्या रागाला तोंड देत, विठाबाईंनी त्यांची कला जिवंत ठेवण्याचा प्रयत्न केला.
विठाबाई यांच्याबद्दल एक किस्सा प्रचंड प्रसिद्ध आहे. ९ महिन्यांच्या गरोदर असताना विठाबाई यांना लावणी करताना प्रसुती वेदना सुरु झाल्या. पण त्यांनी लावणी थांबवली नाही. एवढंच नाही तर, त्यांना कळलं होतं की, त्या कोणत्याही क्षणी बाळाला जन्म देऊ शकतात.
अशात तीव्र प्रसुती वेदना सुरु झाल्यानंतर विठाबाई मंचामागे गेल्या आणि बाळाला जन्म दिला. एवढंच नाही तर, गर्भ नाळ देखील विठाबाई यांनी दगडाने ठेचून काढली. बाळाला जन्म दिल्यानंतर त्यांनी पुन्हा प्रेक्षकांसमोर लावणी करण्यास सुरुवात केली. त्यांनी सादरीकरण थांबवलं नाही .
श्रद्धा कपूरचं मराठी कनेक्शन
श्रद्धा कपूरचं मराठी कनेक्शन जगजाहीर आहे. अभिनेत्रीचे आजोबा पंढरीनाथ कोल्हापुरे एक प्रसिद्ध गायक आणि कलाकार होते. श्रद्धा फार चांगलं मराठी बोलते. बायोपिकबद्दल सांगायचं झालं तर, याआधी देखील श्रद्धाने ‘हसीना पारकर’ सिनेमात मुख्य भूमिका साकारली होती. सिनेमात श्रद्धाने दाऊद इब्राहिमची बहीण हसीना पारकरच्या भूमिकेला न्याय दिला होता. पण हा सिनेमा मोठ्या पडद्यावर अयशश्वी ठरला.