मुंबई : डेंग्यू किंवा इतर काही संसर्गजन्य आजारांमुळे शरीरातील प्लेटलेट्सची संख्या कमी होणे ही गंभीर बाब ठरू शकते. अशावेळी योग्य आहार घेतल्यास प्लेटलेट्स वाढण्यास मदत होऊ शकते. शरीरात रक्ताच्या गाठी तयार होण्यासाठी आणि जखमा लवकर भरून येण्यासाठी प्लेटलेट्स अत्यंत आवश्यक असतात.
विशेषतः अशा काळात काही जीवनसत्त्वे आणि खनिजयुक्त अन्नपदार्थांचा समावेश केल्यास प्लेटलेट्सची पातळी लवकर सुधारू शकते. चला तर मग जाणून घेऊया अशा कोणत्या नैसर्गिक घटकांचा समावेश तुम्ही तुमच्या आहारात करायला हवा.
हे पदार्थ प्लेटलेट्स वाढवण्यात प्रभावी ठरतात:
व्हीटग्रास (गव्हाच्या पात्या)
व्हीटग्रासमध्ये व्हिटॅमिन्स, खनिजे आणि अँटीऑक्सिडंट्स मुबलक प्रमाणात असतात. रोज व्हीटग्रास ज्यूसचे सेवन केल्याने रक्तशुद्धी होते आणि प्लेटलेट्सची पातळी सुधारते.
आवळा
व्हिटॅमिन सीने भरपूर असलेला आवळा रोगप्रतिकारक शक्ती वाढवतो आणि शरीराला बळकटी देतो. रोज आवळा खाणे किंवा रस घेणे फायदेशीर ठरते.
गिलोय
आयुर्वेदात गिलोयला अमृता म्हणतात. हे एक रोगप्रतिकारक शक्ती वाढवणारे औषध आहे. गिलोयच्या वेलीची काढा करून घेतल्यास प्लेटलेट्स वाढण्यास मदत होऊ शकते.
पपईची पाने
पपईच्या पानांमध्ये असलेले विशेष एंझाइम प्लेटलेट्स वाढवण्यास मदत करतात. या पानांचा रस काढून नियमित सेवन केल्यास लक्षणीय सुधारणा दिसू शकते.
भोपळा
भोपळ्यामध्ये असलेले व्हिटॅमिन A अस्थिमज्जेला सक्रिय करते, ज्यामुळे प्लेटलेट्सची निर्मिती वाढते. गाजर, रताळे, पालक हेही या कामी फायदेशीर आहेत.
दूध
दूधामध्ये कॅल्शियम, प्रथिने आणि व्हिटॅमिन K असते. हे रक्त गोठवण्यासाठी आवश्यक असून प्लेटलेट्स वाढवण्यासही सहाय्यक ठरते.
डाळिंब
लोह आणि अँटीऑक्सिडंट्सने समृद्ध असलेले डाळिंब प्लेटलेट्स वाढवण्यासाठी उपयुक्त आहे. यामुळे रक्तातील हिमोग्लोबिनही सुधारते.
फोलेटयुक्त पदार्थ
फोलेट म्हणजेच व्हिटॅमिन B9 रक्तातील निरोगी पेशी निर्माण करण्यात महत्त्वाची भूमिका बजावतो. यासाठी हिरव्या पालेभाज्या, भात, बीन्स, आणि सोयाबीन खाणे लाभदायक ठरते.
जर प्लेटलेट्स खूप कमी असतील, तर डॉक्टरांचा सल्ला घेणे अत्यावश्यक आहे. हे घरगुती उपाय केवळ सौम्य ते मध्यम स्थितीत उपयुक्त ठरतात. योग्य वैद्यकीय उपचारांसोबतच योग्य आहार घेतल्यास रोगप्रतिकारशक्ती वाढवता येते.