बदलापूर (वार्ताहर) : आज राज्यातील आगामी स्थानिक स्वराज्य संस्थांच्या निवडणुकीच्या पार्श्वभूमीवर २४७ नगरपालिका आणि १४७ नगरपंचायतींच्या नगराध्यक्षपदासाठीच्या आरक्षणाची सोडत जाहीर करण्यात आली. यापैकी ६७ पदे नागरिकांच्या मागास प्रवर्गासाठी आरक्षित असून ३४ नगर परिषदेत ओबीसी प्रवर्गासाठी नगराध्यक्षपद हे महिलांसाठी राखीव आहेत.
यामध्ये कुळगाव-बदलापूर नगर परिषदेचा समावेश आहे. सोडत काढून नगराध्यक्षपदासाठी आरक्षण जाहीर झाल्याने स्थानिक पातळीवरील अनेक दिग्गजांची राजकीय समीकरणे बदलणार आहेत. अनेक दिवसांपासून नगराध्यक्ष पदाचे स्वप्न पहाणाऱ्यांची निराशा झाली असून आयत्यावेळी वेगळ्याच प्रवर्गासाठी नगराध्यक्षपद राखीव झाल्याने राजकीय पक्षांना नवीन चेहरा शोधावा लागणार आहे.
बदलापुरात सोशल मीडियावर संभाव्य नगराध्यक्ष म्हणून रती पातकर, रुचिता घोरपडे, रचना भोईर, वीणा म्हात्रे, उषा म्हात्रे, शीतल राऊत आणि संगीता चेंदवणकर यांची नावे व्हायरल होत आहेत.