सोलापूर : दरवर्षी परंपरेनुसार आषाढी एकादशीला राज्याचे मुख्यमंत्री पूजा करतात. राज्याला उपमुख्यमंत्री असले तर ते कार्तिक एकादशीला पूजा करतात. पण राज्यात दोन उपमुख्यमंत्री आहेत. त्यामुळे उपमुख्यमंत्री एकनाथ शिंदे यांना कार्तिकी एकादशीच्या पूजेचं निमंत्रण द्यायचं की उपमुख्यमंत्री अजित पवार यांना पूजेचं निमंत्रण द्यायचं? या पेचात पंढरपूरची मंदिर समिती पडली होती. मंदिर समितीची काल महत्त्वाची बैठक पार पडली होती. या बैठकीत या विषयावर चर्चा झाली. या बैठकीत विधी आणि न्याय विभागाकडे विचारणा करण्याबाबत ठरलं. त्यानुसार विधी आणि न्याय विभागाला विचारणा करण्यात आली. यानंतर विधी आणि न्याय विभागाने एकनाथ शिंदे पूजेला येतील, अशी माहिती दिली.
कार्तिकी एकादशी ही येत्या १ नोव्हेंबरला असणार आहे. या काळात स्थानिक स्वराज्य संस्थांच्या निवडणुकांची आचारसंहिता लागली तर निवडणूक आयोगाकडे परवानगी मागितली जाईल. निवडणूक आयोगाच्या परवानगी मिळाल्यानंतर एकनाथ शिंदे यांच्या हस्ते कार्तिकी एकादशीची पूजा पार पडेल.
यापूर्वीही २०२३ मध्ये राज्यात देवेंद्र फडणवीस आणि उपमुख्यमंत्री अजित पवार हे दोन उपमुख्यमंत्री होते. त्यावेळी देवेंद्र फडणवीस यांच्या हस्ते ही पूजा करण्यात आली होती. २०२४ मध्ये कार्तिकी यात्रा काळात विधानसभा निवडणुकीची आचारसंहिता असल्याने पुणे येथील विभागीय आयुक्त कुलकुंडवार यांच्या हस्ते कार्तिकीची महापूजा झाली होती. याही वर्षी कार्तिकी यात्रा काळात जिल्हा परिषद व नगरपालिका निवडणुकीची आचारसंहिता राज्यात लागण्याची शक्यता असून अशावेळी निवडणूक आयोगाच्या विशेष परवानगीने उपमुख्यमंत्र्यांना पूजा करता येऊ शकणार आहे.
यापूर्वीही २०१७ मध्ये जिल्हा परिषदेची आचारसंहिता असताना मंत्री चंद्रकांत पाटील यांच्या हस्ते कार्तिकी एकादशीची महापूजा झाली होती. त्याच पद्धतीने जरी आचारसंहिता लागली तरी निवडणूक आयोगाच्या परवानगीने उपमुख्यमंत्र्यांना पूजा करता येणार आहे. या निर्णयानंतर मंदिर समिती एकनाथ शिंदे यांना निमंत्रण देण्यासाठी जाणार असल्याची माहिती आहे.