लॉर्ड्स : टीम इंडियाचा माजी कर्णधार विराट कोहली सध्या आंतरराष्ट्रीय क्रिकेटपासून दूर आहे. इंडियन प्रीमियर लीग (IPL) २०२५ मध्ये कोहली रॉयल चॅलेंजर्स बंगळुरू (RCB) साठी मैदानावर दिसला होता. त्यानंतर आरसीबीने पंजाब किंग्ज (PBKS) ला हरवून पहिल्यांदाच आयपीएलचे विजेतेपद जिंकले. आयपीएलच्या मध्यात कोहलीने कसोटी क्रिकेटमधून निवृत्ती घेतली. यामुळे, किंग कोहली इंग्लंड दौऱ्याचाही भाग होऊ शकला नव्हता. मात्र आता विराट कोहली या वर्षी ऑक्टोबरमध्ये ऑस्ट्रेलियाविरुद्ध एकदिवसीय सामन्यात दमदार पुनरागमन करण्याची शक्यता आहे. त्यासाठी कोहलीने ऑस्ट्रेलिया दौऱ्याच्या तयारीला देखील सुरूवात केल्याचे म्हंटले जात आहे. सध्या कोहली लंडनमधील लॉर्ड्स क्रिकेट ग्राउंडवर सरावात व्यस्त आहे.
विराट कोहलीने लॉर्ड्स क्रिकेट ग्राउंडच्या बाहेर चाहत्यांसोबत फोटो देखील काढले. भारत आणि ऑस्ट्रेलिया यांच्यातील एकदिवसीय मालिकेतील पहिला सामना १९ ऑक्टोबर रोजी पर्थ येथे खेळला जाईल. त्यानंतर उर्वरित दोन एकदिवसीय सामने २३ ऑक्टोबर (अॅडिलेड) आणि २५ ऑक्टोबर (सिडनी) रोजी दोन्ही संघांमध्ये खेळले जातील.
विराट कोहली आणि रोहित शर्मा यांच्या एकदिवसीय क्रिकेटमधून निवृत्तीबद्दल बीसीसीआयची प्रतिक्रिया
अलीकडेच, विराट कोहली आणि रोहित शर्मा यांच्या एकदिवसीय क्रिकेटमधून निवृत्तीबद्दल अटकळ बांधली जात होती, परंतु भारतीय क्रिकेट नियामक मंडळाने (BCCI) हे वृत्त फेटाळून लावले आहे. बीसीसीआयचा असा विश्वास आहे की, खेळाडूने स्वतः त्याच्या भविष्याचा निर्णय घ्यावा, बोर्ड कधीही कोणत्याही खेळाडूला जबरदस्तीने निवृत्ती घेण्यास सांगत नाही.
दरम्यान, आरसीबीचा युवा फलंदाज स्वस्तिक चिकारानेदेखील विराट कोहली लवकरच पुनरागमन करणार असल्याची शक्यता चाहत्यांसोबत शेअर केली आहे, त्यामुळे विराट कोहलीच्या चाहत्यांची उत्सुकता वाढली आहे.
२०२७ च्या एकदिवसीय विश्वचषकापर्यंत विराट कोहली भारतीय संघाकडून खेळताना दिसू शकतो. या विश्वचषकासाठी अजून दोन वर्षांहून अधिक काळ शिल्लक आहे. अशा परिस्थितीत, विराट कोहलीला त्याची तंदुरुस्ती आणि फॉर्म कायम ठेवावा लागेल कारण तरुण खेळाडू सातत्याने चांगली कामगिरी करून संघात स्थान मिळवण्याचा प्रयत्न करत आहेत.