मुंबई (प्रतिनिधी) : चालकाला सन्मानजनक मोबदला व प्रवाशांना सुरक्षित प्रवासाची हमी देणारे राज्य शासनाचे अधिकृत यात्री अॅप लवकरच एसटी महामंडळ मार्फत सुरू करण्यात येत असल्याची माहिती परिवहन मंत्री प्रताप सरनाईक यांनी दिली.
ते मंत्रालयातील आपल्या दालनामध्ये केंद्र व राज्य शासनाच्या अॅग्रीगेटेड पॉलिसीच्या आधीन राहून यात्री अॅप बनवण्याच्या अंतिम मसुद्यावरील चर्चेवेळी बोलत होते. या बैठकीला आमदार प्रवीण दरेकर, परिवहन विभागाचे अतिरिक्त मुख्य सचिव संजय सेठी, परिवहन आयुक्त विवेक भीमनवार, एसटी महामंडळाचे व्यवस्थापकीय संचालक डॉ. माधव कुसेकर उपस्थित होते.
छावा राईड'वर एकमत !
या अॅपला एखादे नाव देण्याबाबत चर्चा झाली. नवीन शासकीय अॅपला 'छावा राईड अॅप' हे नाव द्यावे असे ठरले असून मुख्यमंत्री फडणवीस व दोन्ही उपमुख्यमंत्री शिंदे व पवार यांच्या मान्यतेने हे अॅप कार्यान्वित करण्यासाठी प्रयत्न केले जातील, असे सरनाईक यांनी सांगितले.