ऑनलाइन पत्ते खेळण्याचे प्रकरण माणिकराव कोकाटेंच्या अंगलट
मुंबई: महाराष्ट्राच्या मंत्रिमंडळात मोठा फेरबदल करण्यात आला आहे. कृषी मंत्री माणिकराव कोकाटे यांना त्यांच्या पदावरून हटवण्यात आले असून, आता त्यांच्याकडे क्रीडा आणि युवक कल्याण मंत्रालयाची जबाबदारी सोपवण्यात आली आहे. एका विधिमंडळ अधिवेशनादरम्यान ऑनलाइन रमी गेम खेळल्याच्या आरोपांनंतर हा निर्णय घेण्यात आला आहे. दत्ता भरणेंकडे कृषी खात्याचा पदभार सोपवण्यात आला आहे. मुख्यमंत्री देवेंद्र फडणवीस उपमुख्यमंत्री अजित पवार व प्रदेशाध्यक्ष सुनील तटकरे यांच्या सह्याद्री अतिथीगृहावर झालेल्या बैठकीत कोकाटे पांचा खातेबदल करण्याचा निर्णय घेण्यात आला.
रमी गेम प्रकरण आणि वाद
आमदार रोहित पवार यांनी कोकाटे यांचा एक व्हिडिओ सार्वजनिक केला होता, ज्यात ते विधिमंडळाच्या सत्रादरम्यान आपल्या मोबाइलवर ऑनलाइन रमी गेम खेळताना दिसत होते. या घटनेनंतर मोठा गदारोळ झाला आणि महाराष्ट्रातील शेतीच्या संकटातही मंत्र्यांच्या या असंवेदनशील कृत्याबद्दल विरोधी पक्ष नेत्यांनी तीव्र टीका केली.
या प्रकरणानंतर विरोधकांनी त्यांच्या राजीनाम्याची मागणी केली होती, परंतु त्यांना केवळ ताकीद देऊन सोडून देण्यात आले होते. या घटनेमुळे आणि कोकाटे यांच्याशी संबंधित मागील काही वादांमुळे सरकारवर सतत टीका होत होती. या सततच्या टीकेमुळेच सरकारने कोकाटे यांच्याकडील महत्त्वाचे कृषी खाते काढून घेतले असून, त्यांना कमी महत्त्वाचे क्रीडा आणि युवक कल्याण मंत्रालय दिले असल्याचे मानले जात आहे.