अधिवेशनाअगोदरच केली होती समस्यांची पाहणी
विधान परिषदेत आमदारांच्या लक्षवेधी सूचनांवर नितेश राणे यांचे समाधानकारक उत्तर
मुंबई : ‘मुंबईवर पहिला अधिकार कोळी समाजाचा, मच्छीमार बांधवांचा आहे, त्यामुळे कोणत्याही मच्छीमार बांधवाला हक्कांपासून वंचित आमचे शासन ठेवणार नाही. मी स्वतः ससून डॉक परिसरात जाऊन त्या भागातील स्थिती पाहिली आहे. मच्छीमार ज्या ठिकाणी बसतात, त्या ठिकाणी गळणाऱ्या छपराचे नूतनीकरण केले आहे. पावसाळ्यात पाणी येणार नाही, असे छप्पर आता बांधण्यात आले आहे. आणखीन ऑक्शन हॉल, शौचालये नव्याने व दर्जेदार पद्धतीने बांधण्याच्या सूचना दिल्या आहेत. ससून डॉक येथील कोळी व मच्छीमार बांधवांच्या सर्व अपेक्षा पूर्ण करू’, असा विश्वास मत्स्य व बंदरे विकास मंत्री राणे यांनी विधान परिषदेत दिला.
विधान परिषदेत ससून डॉक संदर्भातील परिषद सदस्यांच्या लक्षवेधी सूचनांवर चर्चेला उत्तर देताना मंत्री नितेश राणे बोलत होते. यावेळी आमदार राजेश राठोड, आमदार चित्रा वाघ, आमदार शिवाजीराव गरजे, आमदार सचिन अहिर, यांनी लक्षवेधी मांडल्या. ससून डॉक परिसराला पूर्णपणे विकसित करून दर्जेदार सुविधा देण्याचे शासनाचे धोरण आहे, असे मंत्री नितेश राणे यांनी सांगितले.
ससून डॉक परिसरातील मच्छीमारांच्या गरजा लक्षात घेऊन महाराष्ट्र मत्स्य उद्योग महामंडळ व मत्स्य व्यवसाय विकास महामंडळामार्फत विकासकामे सुरू असून, यासाठी ९६ कोटी रुपयांचे अंदाजपत्रक तयार करण्यात आले आहे. त्यापैकी २२ कोटी रुपये निधी प्राप्त झाला असून, त्यामध्ये आवश्यक मूलभूत सुविधांवर भर दिला जात आहे.