मुंबई: उबाठा गटाने महाराष्ट्राचे उपमुख्यमंत्री एकनाथ शिंदेंना 'जय गुजरात'वरून लक्ष केल्यानंतर आता शिवसेनेकडूनही ठाकरे पिता-पुत्र आणि शरद पवार यांचा जुना व्हिडिओ समोर आणत टिका करणार्‍यांची बोलतीच बंद केली आहे. शिवसेने व्हायरल केलेल्या व्हिडिओत शरद पवार हे 'जय हिंद जय कर्नाटक जय महाराष्ट्र' म्हणत आहेत. तर उद्धव ठाकरेंकडूनही जय गुजरातची २०१९ च्या लोकसभा निवडणूकीतला व्हिडिओ समोर आणला आहे. इतकेच नव्हे तर आदित्य ठाकरेंचा 'जय उत्तरप्रदेश म्हणाल्याचा व्हिडिओदेखील समोर आणला आहे. त्यामुळे आज ठाकरे बंधुकडून शिंदेच्या वक्तव्याचा समाचार घेण्याची शक्यता असतानाच शिंदेंनीही ठाकरेसह पवारांना त्यांची जागा दाखवली आहे.
उपमुख्यमंत्री एकनाथ शिंदे (Eknath Shinde) यांनी काल पुण्यात एका सार्वजनिक कार्यक्रमात 'जय हिंद, जय महाराष्ट्र, ‘जय गुजरात’ अशी घोषणा दिल्याचं पाहायला मिळालं. यावेळी केंद्रीय गृहमंत्री अमित शाह (Amit Shah) व्यासपीठावर उपस्थित होते. एकनाथ शिंदे यांच्या जय गुजरात या घोषणेवर विरोधकांनी चांगलीच टीका केली होती.
उद्धव ठाकरेंचांही 'जय गुजरातचा' नारा
विरोधकांच्या या टीकेनंतर शिवसेना नेत्या शितल म्हात्रे यांनी देखील उद्धव ठाकरेंचा एक व्हिडीओ ट्वीट केलाय. यामध्ये उद्धव ठाकरे यांनी देखील 'जय गुजरात' अशी घोषणा दिल्याचे पाहायला मिळत आहे. यामध्ये उद्धव ठाकरे हे "आप आगे चलो हम साथ है, जय हिंद जय महाराष्ट्र जय गुजरात" म्हणत असल्याचे दिसत आहे. अनेक जण हे विसरले असतील म्हणून परत लक्षात आणून द्यायचा हा प्रयत्न असे म्हणत शितल म्हात्रे यांनी उद्धव ठाकरेंना टोला लगावलाय.
मुख्यमंत्र्यांनीही केली शिंदेंची पाठराखण
मुंबईत बोलताना फडणवीस यांनी स्पष्ट केले की, एकनाथ शिंदे यांनी 'जय गुजरात' म्हटले म्हणजे त्यांचे गुजरातवर प्रेम असून महाराष्ट्रावर प्रेम नाही असे समजणे चुकीचे आहे. त्यांनी शरद पवार यांचे उदाहरण देत सांगितले की पवार साहेबांनी देखील एकदा कर्नाटकच्या लोकांमध्ये अशीच घोषणा दिली होती. त्यामुळे इतका संकुचित विचार कुणी करत असेल तर ते चुकीचे आहे आणि आता विरोधकांकडे मुद्दे नाहीत, असे म्हणत त्यांनी विरोधकांना सुनावले.