अहमदाबाद: अहमदाबादमध्ये एअर इंडियाचे प्रवासी विमान क्रॅश झाले. या दुख:द घटनेनंतर केंद्रीय गृहमंत्री अमित शाह यांनी घटनास्थळाची पाहणी केली. ते म्हणाले भारत सरकार आणि गुजरात सरकारचे सर्व विभाग एकत्रितपणे बचावकार्यात सहभागी आहेत. या विमानात एकूण देश आणि विदेशातील २४२ जण होते. यात २३० प्रवासी आणि १२ क्रू मेंबर्सचा समावेश होता. यात एका प्रवाशाचा जीव बचावल्याची माहिती मिळाली आहे. मी त्याला भेटून आलो आहे. मृत्यूचा आकडा डीएनए टेस्ट आणि ओळख पटल्यानंतर अधिकृतपणे जाहीर केला जाईल. गुजरात सरकारने सर्व विभागांना अलर्ट केले आहे. सर्वांनी एकत्रित मिळून बचाव कार्य चालू केले आहे.
अमित शाह म्हणाले, सव्वा लाख लीटर इंधन विमानात होते. उष्णता आणि तापमान खूप जास्त होोते. कोणालाही वाचवण्याची संधी मिळाली नाही. मी घटनास्थळीही जाऊन आलो. सर्वांना बाहेर काढण्याचे काम पूर्ण झाले आहे. प्रवाशांचे जितके नातेवाईक येथे पोहोचले आहेत त्यांचे डीएनए घेतले जाणार आहे. साधारण १ हजाराहून अधिक डीएनए टेस्ट कराव्या लागतील आणि या सर्व टेस्ट गुजरातमध्येच होतील. डीएनए सँपल घेण्याची प्रक्रियाही लवकरच पूर्ण केली जाईल. यानंतर मृतदेह कुटुंबियांकडे सुपूर्द केले जातील.
केंद्रीय गृहमंत्री पुढे म्हणाले, एव्हिएशन डिपार्टमेंटने तपास वेगात सुरू केला आहे. याचा तपास वेगाने झाला पाहिजे असे आदेश मंत्र्यांना देण्यात आले आहे. बचावकार्य सुरू आहे. हा एक अपघात होता. अपघाताला कोणी रोखू शकत नाही. मी या दुर्घटनेत मृत्यूमुखी पडलेल्यांच्या नातेवाईकांप्रति संवेदना व्यक्त करतो.