बाबा सिद्दीकीच्या हत्येमागील मास्टरमाइंडला कॅनडामध्ये अटक, कोण आहे झीशान अख्तर? जाणून घ्या

NCP नेते बाबा सिद्दीकी हत्याकांडातील (Baba Siddiqui murder Case) मास्टरमाइंड जीशान अख्तर ऊर्फ जस्सी पुरेवालला कॅनडाच्या सरे पोलिसांनी ताब्यात घेतलं आहे. मुंबई पोलीस दलातील सूत्रांनी याची पुष्टी केली. जीशान पंजाबच्या जालंधरचा राहणारा आहे. तो लॉरेन्स बिश्नोई गँगशी संबंधित आहे. तो बाबा सिद्धिकी यांच्या हत्येच्या कटात सहभागी होता.

मुंबई पोलिसांनी दिलेल्या माहितीनुसार, महाराष्ट्राचे माजी मंत्री आणि राष्ट्रवादी काँग्रेस पक्षाचे (अजित पवार गट) नेते बाबा सिद्दीकी यांच्या हत्येमागील कथित सूत्रधार झीशान अख्तरला मंगळवारी कॅनडामध्ये ताब्यात घेण्यात आले. जीशान हत्येनंतर फरार झाला होता. कथित पाकिस्तानी डॉन शहजाद भट्टीच्या मदतीने तो कॅनडात पोहोचला. मुंबई पोलीस आता त्याचं प्रत्यर्पण करुन त्याला भारतात आणण्याची प्रक्रिया सुरू करण्याची शक्यता आहे. दरम्यान कॅनडा पोलिसांनी जीशान अख्तरला कुठल्या आरोपांखाली अटक केली आहे, त्याची अद्याप पुष्टी झालेली नाही.

१२ ऑक्टोबर २०२४ च्या रात्री मुंबईतील वांद्रे (पूर्व) येथील त्यांचा मुलगा, माजी आमदार झिशान सिद्दीकीच्या कार्यालयाबाहेर तीन हल्लेखोरांनी ६६ वर्षीय सिद्दीकी यांची गोळ्या घालून हत्या केली. गेल्या वर्षी बाबा सिद्दीकी यांच्या हत्येत सहभागी आणि हल्ल्यासाठी आवश्यक शस्त्र हाताळण्याचा आरोप अख्तरवर आहे.  गुन्ह्याचे नियोजन आणि अंमलबजावणी करण्यात अख्तरची महत्त्वाची भूमिका बजावली असल्याचे मानले जाते.

कोण आहे झीशान अख्तर?

मोहम्मद यासीन अख्तर म्हणून ओळखला जाणारा झीशान अख्तर हा मूळचा पंजाबमधील जालंधरचा रहिवासी असून आणि त्याची पार्श्वभूमी गुन्हेगारीचीच आहे. यापूर्वी, २०२२ मध्ये, पंजाब पोलिसांनी त्याला एका असंबंधित प्रकरणात अटक केली होती. बाबा सिद्दीकीच्या खून प्रकरणाच्या तपासादरम्यान त्याचे नाव एक प्रमुख संशयित म्हणून समोर आले आहे.

अख्तरवर सिद्दीकीच्या हत्येत सहभागी असलेल्या तीन शूटर्स - धर्मराज कश्यप, गुरमेल बलजीत सिंग आणि शिवकुमार गौतम - यांच्याशी समन्वय साधल्याचा आरोप आहे. अख्तरने त्यांचा हँडलर म्हणून काम केले आणि योजना राबविण्यात महत्त्वाची भूमिका बजावली.

बिश्नोई गँगशी संबंध

पोलिस तपास आणि आरोपपत्रातील तपशीलांनुसार, अख्तर हा तुरुंगात बंद असलेल्या गँगस्टर लॉरेन्स बिश्नोईचा जवळचा सहकारी मानला जातो, जो देशभरातील अनेक हाय-प्रोफाइल गुन्ह्यांशी जोडला गेला आहे. सूत्रांच्या माहितीनुसार, पंजाब तुरुंगात शिक्षा भोगत असताना अख्तर बिश्नोई टोळीशी जोडला गेला, जिथे तो गोळीबार करणाऱ्यांपैकी एक असलेल्या गुरमेल सिंगला भेटला. त्यानंतर दुसऱ्या तुरुंगात  हलवण्यापूर्वी, अख्तरने कथितपणे आगामी "नियुक्ती" चे संकेत दिले होते, असे मानले जाते की ते बाबा सिद्दीकी यांना संपवण्याची योजना होती.