कल्याणमध्ये भुयारी मलनिस्सारण वाहिन्यांचे पाणी रस्त्यावर

सांडपाण्यामुळे नागरी आरोग्याला धोका

कल्याण: कल्याणातील मुख्य रस्त्यावर अंडर ग्राउंड ड्रेनज लाईनच्या चेम्बरची झाकणे खाली दबली गेली असून त्या चेम्बरमधून दुर्गंधी युक्त प्रक्रिया न केलेले सांडपाणी वाहत असल्याने नागरी आरोग्यासह संभाव्य रोगराईचा प्रश्न ऐरणीवर आला आहे.

कल्याण पश्चिमेतील राजा हॉटेल परिसरात केडीएमसी मुख्यालयापासून हाकेच्या अंतरावर असलेल्या शंकरराव चौक ते टिळक चौककडे जाणाऱ्या रस्त्यावर अंडर ग्राऊंड ड्रेनज लाईनच्या चेम्बरचे झाकण १७ मे रोजी तुटल्यामुळे दुर्गंधी युक्त सांडपाणी रस्त्यावर वाहत आहे. या संदर्भात कल्याण डोंबिवली मनपामध्ये दक्ष नागरिक योगेश मोकाशी यांनी तक्रार केली होती. तरी देखील केडीएमसी प्रशासन याकडे दुर्लक्ष करत असल्याने संभाव्य रोगराई पसरण्याची भीती व्यक्त केली जात आहे.

"क" प्रभाग क्षेत्र अंतर्गत येणाऱ्या शंकरराव चौक ते टिळक चौक रस्त्यावर वाहनासह करदात्या नागरिकांची वर्दळ असते. रस्त्यावर वाहत असलेल्या दुर्गंधी युक्त सांडपाण्यातून त्यांना ये जा करावी लागते हे दुर्दैव म्हणावे लागेल. मनपा क्षेत्रात अंडर ग्राउंड ड्रेनज लाईनच्या माध्यमातून सांडपाणी, मलयुक्त घाण मलनिस्सारण केंद्रापर्यंत नेत प्रक्रिया करून सांडपाणी बागा, इतर तत्सम कामासाठी वापर करण्याचे प्रशासनाचे नियोजन असते. पंरतु अंडर ग्राऊंड चेम्बरची झाकणे तुटून चेंबरांच्या तुंबापुरीमुळे रस्त्यावर सांडपाणी वाहत असेल आणि त्यावर कारवाई होत नाही, म्हणजे नागरिकांच्या जीवनाशी खेळ चाललेला असल्याचे चित्र यानिमित्ताने दिसत आहे.

हीच परिस्थिती ब प्रभागक्षेत्र अंतर्गत येणाऱ्या पौर्णिमा चौक ते प्रेम आँटो मुरबाड रोड या मुख्य रस्त्यावर रोशन पेट्रोल पंपासमोर अंडर ग्राऊन्ड चेम्बरचे झाकण खचल्याने मोठ्या प्रमाणात दुर्गंधी युक्त सांडपाणी वाहत असून यातच मेट्रोच्या कामामुळे रस्ता अरूंद झाला असून वाहनांची प्रचंड वर्दळ यातून जीव मुठीत धरून पादचाऱ्यांना दुर्गंधी युक्त सांडपाण्यातून वाट काढत चालवी लागत आहे. यात या परिसरात खाजगी हॉस्पिटलची संख्या आणि येणाऱ्या रूग्णांना देखील यांचा फटका बसत आहे. सांडपाण्यातून चालत गेल्यामुळे रोगराईला आमंत्रण दिल्यासारखी परिस्थिती निर्माण झाली आहे.

भुयारी मलनिस्सारण वाहिन्या सफाई ठेकेदाराला निलंबित केले असून, या कामासंदर्भात नवीन नविदा काढण्यात आल्या. प्रतिवर्षासाठी 3 कोटी ६० लक्ष रू तरतूद असून यामध्ये ठेकेदाराने १ सक्शन वाहन, २ जेटिंग वाहने, ४ ग्राँफ बकेट वाहने आदींच्या सहाय्याने चोक अप आदी काम करणे अपेक्षित असते, असे पालिका सूत्रांनी सांगितले.