पुणे: पुणे येथील वैष्णवी हगवणे मृत्यू प्रकरणामुळे संपूर्ण महाराष्ट्र हादरला आहे. सासरच्या होणाऱ्या त्रासामुळे आणि मारहाणीला कंटाळून वैष्णवी हगवणेने आपल्या राहत्या घरी गळफास घेतल्याची प्राथमिक माहिती आहे. मात्र, ही आत्महत्या नसून तिच्या सासरच्या लोकांनी हत्या केल्याचा आरोप तिच्या माहेरच्यांनी केला. ज्याच्या आरोपाखाली वैष्णवीचा नवरा शशांक हगवणेसह सासरे, सासू, नणंद आणि दीर या सर्वांची पोलिस चौकशी केली जात आहे. दरम्यान या प्रकरणात अनेक बारीक सारिक गोष्टींची तपासणी केली जात आहे. ज्यामध्ये आरोपींचे मोबाईल फोन, लॅपटॉपचा समावेश तर आहेच पण आता वैष्णवीने गळफास घेण्यासाठी वापरलेल्या साडीची आणि पंख्याची देखील फॉरेन्सिक तपासणी केली जाणार आहे.
साडी आणि पंखा फॉरेन्सिक लॅबमध्ये रवाना
वैष्णवीने गळफास घेतला तो पंख किती वजन पेलू शकतो याची चाचणी केली जाणार आहे. तसंच वैष्णवीचा पती, सासरा आणि दिराला न्यायालयात हजर केलं जाणार आहे. या तिघांची आज पोलीस कोठडी संपत आहे. त्यामुळे अधिक चौकशीसाठी पोलिस कोठडीत वाढ करण्यासाठी लवकरच त्यांना न्यायालयात हजर केले जाणार आहे.