घरात सापडले तब्बल २ कोटी!

भुवनेश्वर : सरकारी नोकरशाहीतील भ्रष्टाचाराचे थरकाप उडवणारे चित्र ओडिशातील भुवनेश्वरमध्ये पाहायला मिळाले. जलसंपदा विभागात वरिष्ठ पदावर कार्यरत असलेल्या बैकुंठनाथ सारंगी याच्या घरावर छापा टाकला असता, घाबरलेल्या सारंगीने थेट खिडकीतून रोख पैशांची बंडल बाहेर फेकण्याचा प्रकार घडला. ही घटना संपूर्ण परिसरात आणि सोशल मीडियावर चर्चेचा विषय ठरली असून, या प्रकरणाचे थरारक व्हिडीओ सध्या व्हायरल होत आहेत.

ओडिशा राज्याच्या भ्रष्टाचारविरोधी विभागाने (Vigilance Department) बेहिशेबी संपत्तीप्रकरणी कारवाई करत सारंगीच्या अनेक ठिकाणच्या मालमत्तांवर एकाच वेळी छापे टाकले. त्याच्या भुवनेश्वरमधील फ्लॅटवर छापा पडताच, खिडकीतून पाचशे रुपयांची बंडले फेकताना तो रंगेहाथ सापडला. सतर्क अधिका-यांनी तातडीने ती रोख रक्कम हस्तगत केली.

छाप्यात उघड झालेला पैसा पाहून अधिकारीही थक्क झाले. घराच्या विविध भागांत लपवून ठेवलेली मोठ्या प्रमाणातील रोख रक्कम, सोनं, मौल्यवान वस्तू आणि बँक खात्यांचे दस्तऐवज जप्त करण्यात आले आहेत. आतापर्यंतच्या तपासात तब्बल २ कोटी रुपयांहून अधिकचा बेहिशेबी साठा समोर आला असून, ही रक्कम आणखी वाढण्याची शक्यता प्रशासनाने वर्तवली आहे.

Today , on the allegation of possession of disp. assets by Sri Baikuntha Nath Sarangi, Chief Engineer, RW Division, Odisha, house searches are on by Odisha Vigilance at 7 locations. Approx Rs 2.1 Crore cash recovered so far from his house at Bhubaneswar (1 Cr) & Angul (1.1 Cr):… pic.twitter.com/IyqSntJudI

— IANS (@ians_india) May 30, 2025

बैकुंठनाथ सारंगीच्या उत्पन्नाच्या तुलनेत त्याची संपत्ती संशयास्पदरीत्या अधिक असल्याचे स्पष्ट झाले आहे. त्यामुळे त्याच्याविरुद्ध गुन्हा दाखल करण्यात आला असून आर्थिक व्यवहारांची बारकाईने चौकशी सुरू आहे.