महिन्याभरापूर्वी शिवसेनेत प्रवेश केलेल्या नेत्या, विद्याताई जावेद गाडेकर व त्यांचे पती जावेद यासीन पठाण ( रा.शेवगाव ) यांच्या विरोधात शेवगाव पोलीस ठाण्यात रिलायन्स कॉर्पोरेटचे मॅनेजर अतुल नामदेव अटकळे, ( वय ३७ रा.जुना ठाणे शहर ) यांनी दिलेल्या फिर्यादीवरून फसवणूक,मारहाण,धमकी व सामूहिक सहभाग अशा विविध कलमा अंतर्गत गुन्हा दाखल केला आहे.फिर्यादीत म्हटले आहे की, दि.२३ डिसेंबर २०२० रोजी जावेद यासीन पठाण याने अटकळे यांना त्याचे राहते घरी विद्यानगर येथे बोलावून घेतले. त्यावेळी त्याची पत्नी विद्या या देखील घरीच होत्या.यावेळी घरात असलेली चैतन्य कानिफनाथ मढी यांच्या गादीचे दर्शन घेण्यास सांगितले.आणि त्यांचे घरात असलेले सोन्याचे दागिने दाखविले.त्यावेळी जावेद पठाण अटकळे यांना म्हणाला की, त्याचा सोने विक्रीचा व्यवसाय आहे.मोठ्या प्रमाणात सोने खरेदी करतो.सोने खरेदी विक्रीचा व्यवसाय असल्याने इतरांना कमी दरात शुद्ध सोने विक्री करुन त्याचा फायदा करुन दिलेला आहे.जास्तीत जास्त पैशाची गुंतवणुक केली तर कमी दरात सोने देईन, असे आश्वासन दिले.
आश्वासनाला बळी पडून १५ जानेवारी २०२१ रोजी अतुल नामदेव अटकळे यांनी २ लाख रुपये आणि २३ जानेवारी २०२१ रोजी आणखी २ लाख रुपये असे एकूण ४ लाख रुपये IMPS द्वारे त्यांच्या खात्यावर वर्ग केले.मात्र त्यानंतर सांगितल्याप्रमाणे, त्या दोघांनी कोणतेही शुद्ध सोने दिले नाही. दरम्यानच्या काळात कोव्हिड असल्याने अटकळे यांचे शेवगाव येथे येणे झाले नाही.यादरम्यान त्यांनी वेळोवेळी फोन करण्याचा प्रयत्न केला असता त्यांनी फोन घेतले नाही.वारंवार टाळाटाळ केली.तसेच त्यांनी कोणतेही शुद्ध सोने दिले नाही.आणि गुंतवणूक केलेले पैसेही परत केले नाही. प्रत्येक वेळी वेगवेगळी कारणे सांगुन टाळाटाळ केली. त्या दोघांना पैसे मागितले असता तुमचेवर खोटा गुन्हा दाखल करु आणि जेलमध्ये टाकू अशी धमकी दिल्याचे अतुल नामदेव अटकळेने सांगितले. गुन्ह्याचा तपास पोलीस उपनिरीक्षक प्रवीण महाले हे करत आहेत.