अलिबाग : मोहोपाडा ते दांडफाटा या मार्गावरील सेबी वळणावरील सार्वजनिक बांधकाम विभागाकडून नव्याने बांधण्यात आलेल्या पुलाजवळ खालील बाजूस चेंबरला भला मोठा भगदाड पडल्याने तेथे मोठ्या अपघातांची भीती व्यक्त होत आहे. दांडफाट्याकडे, तसेच एनआयएसएम सेबीकडे येजा करणाऱ्या रस्त्यावरून वाहनांची सतत रेलचेल सुरू असते. अशा वेळी वाहन चालकांना आपला जीव मुठीत घेऊन प्रवास करावा लागत आहे. या भल्या मोठ्या भगदाडमुळे तेथे अपघात होऊन वाहन चालक जखमी किंवा त्यांची जीवितहानी होण्याचा धोका आहे. याची दखल महाराष्ट्र शासनाच्या सार्वजनिक बांधकाम विभाग आणि रसायनी पाताळगंगा मराविमने घेऊन संबंधित कंत्राटदाराला सेबी रस्त्याजवळ असलेल्या पुलालगत असलेल्या भगदाडाची दुरुस्ती करावी अशी मागणी स्थानिकांकडून होत आहे.
