ज्योती मल्होत्रानंतर आणखीन एक युट्यूबर पाकिस्तानची हेर?

पाकिस्तानसाठी हेरगिरी प्रकरणी युट्यूबर प्रियंका सेनापतीची चौकशी

नवी दिल्ली:  हरियाणातील हिसारमध्ये युट्यूबर ज्योती मल्होत्राच्या बाबतीत आता ओडिशा कनेक्शनही समोर आले आहे. केंद्रीय गुप्तचर संस्था इंटेलिजेंस ब्युरो (IB) आणि पुरी पोलिसांच्या संयुक्त प्रयत्नांमुळे, या प्रकरणाचा तपास आता पुरीपर्यंत पोहोचला आहे. कारण ओडीशा मधील पुरी येथील युट्यूबर प्रियांका सेनापती हिच्यावर देखील पाकिस्तानसाठी हेरगिरी प्रकरणी चौकशी करण्यात आली आहे.

सूत्रांनी दिलेल्या माहितीनुसार, ज्योती मल्होत्रा ​​सप्टेंबर 2024 मध्ये ओडिशाच्या पुरीला गेली होती. या काळात तिने जगन्नाथ मंदिर आणि त्याच्या सभोवतालच्या सरकारी परिसराचे फोटो आणि व्हिडिओ बनवले होते. सुरक्षा यंत्रणांना संशय आहे की या ठिकाणांची माहिती डिजिटल प्लॅटफॉर्मद्वारे पाकिस्तानमधील कार्यकर्त्यांना पाठवण्यात आली होती. या काळात ज्योती प्रियंका सेनापतीला भेटली किंवा तिच्या संपर्कात होती असाही तपास यंत्रणांना संशय आहे. ज्योती मल्होत्रा ​​आणि प्रियंका सेनापती यांच्यात संशयास्पद संबंध समोर आल्यानंतर आयबीने पुरी पोलिसांच्या सहकार्याने तपास सुरू केला आहे.

प्रियंका सेनापती ज्योती मल्होत्राच्या संपर्कात

ज्योतीने जगन्नाथ मंदिर आणि जवळच्या सरकारी आस्थापनांसह अनेक महत्त्वाच्या ठिकाणांचे फोटो आणि व्हिडिओ टिपले होते. या ठिकाणांवरील संवेदनशील प्रतिमा आणि डेटा परदेशी कार्यकर्त्यांना पाठवला जाऊ शकतो. या प्रकरणाच्या चौकशीच्या संदर्भात, आयबी अधिकाऱ्यांनी पुरीची युट्यूबर प्रियंका सेनापती हिची चौकशी केली आहे. चौकशीच्या कक्षेत आल्यानंतर प्रियांका सेनापतीने सोशल मीडियावर लाईव्ह येऊन आपली भूमिका स्पष्ट केली आहे.

सोशल मीडियाद्वारे प्रियंकाने स्पष्ट केली बाजू

युट्यूबर ज्योती मल्होत्रासोबत संपर्कात आल्याने, प्रियांकावर देखील पाकिस्तानसाठी हेरगिरी केल्याचा संशय व्यक्त केला जात आहे. यासंदर्भात केल्या गेलेल्या चौकशीनंतर, प्रियांकाने सोशल मीडियावर लाईव्ह द्वारे आपली बाजू स्पष्ट केली आहे.  ती म्हणाली की, ज्योती माझी फक्त एक यूट्यूब मैत्रीण होती. तिच्या कोणत्याही गुन्हेगारी कृत्यांबद्दल मला माहिती नव्हते. जर मला माहित असते की ती शत्रू देशासाठी हेरगिरी करत आहे, तर मी तिच्याशी कोणताही संपर्क ठेवला नसता.  प्रियांका पुढे म्हणाली की, मी ज्योतीला व्यावसायिक कंटेंटवरून ओळखत होते. वैयक्तिकरित्या, मला या बातमीने धक्का बसला आहे. मी तपासात पूर्ण सहकार्य करण्यास तयार आहे. ज्योतीच्या अटकेनंतर आणि प्रियांकाच्या चौकशीनंतर, गुप्तचर संस्थांनी पुरी, भुवनेश्वर आणि इतर पर्यटन स्थळांची सुरक्षा वाढवली आहे. विशेषतः, ड्रोन, डीएसएलआर आणि व्यावसायिक कॅमेरे वापरून सार्वजनिक ठिकाणी शूट करणाऱ्या कंटेंट क्रिएटर्सवर लक्ष ठेवले जात आहे.

सुरक्षा तज्ज्ञांचे म्हणणे आहे की हे प्रकरण एका नवीन प्रकारच्या धोक्याकडे निर्देश करते ज्यामध्ये सायबर-एजंट माहिती गोळा करण्यासाठी आणि पाठवण्यासाठी सोशल मीडियाचा वापर करत आहेत. एका सुरक्षा अधिकाऱ्याने सांगितले की आजचा गुप्तहेर कोणत्याही सीमेवरून येत नाही, तो तुमच्या फोनच्या स्क्रीनमागे आहे. तपास यंत्रणांच्या मते, हे प्रकरण एखाद्या मोठ्या कटाचा भाग असू शकते आणि त्याच्या तळाशी जाण्यासाठी ओडिशापासून हरियाणापर्यंत अनेक ठिकाणी तपास सुरू आहे. जर तपासात असे आढळून आले की, प्रियंका सेनापती या प्रकरणात कुठल्याही प्रकारे सहभागी आहे तर तिला देखील अटक होऊ शकते. सध्या, प्रियंका आणि ज्योतीची संभाषणे, सोशल मीडियावरील संवाद आणि डेटा शेअरिंगचा सखोल तपास केला जात आहे.