Pushpa 2 : पुष्पा २’ची रिलीज डेट पुन्हा बदलली! नवी तारीख आली समोर

मुंबई : दाक्षिणात्य सुपरस्टार अल्लु अर्जुन (Allu Arjun) आणि नॅशनल क्रश रश्मिका मंदानाच्या (Rashmika Mandanna) ‘पुष्पा २: द रुल’ (Pushpa 2 The Rule) या सिनेमाची चाहते आतुरतेने वाट पाहत आहेत. बहुप्रतिक्षित चित्रपट असलेल्या ‘पुष्पा २: द रुल’ बाबत सातत्याने नवीन अपडेट्स समोर येत आहेत. १५ ऑगस्ट रोजी प्रदर्शित होणारा हा चित्रपट पुढे ढकलण्यात आला होता. त्यानुसार ६ डिसेंबर रोजी पुष्पा २: द रुल’ चित्रपट प्रेक्षकांच्या भेटीला येणार होता. मात्र आता पुन्हा प्रदर्शनाची तारीख बदलण्यात (Pushpa 2 Release Date) आली आहे. त्यामुळे चाहत्यांना ६ डिसेंबर आधीच पुष्पा २ चित्रपट पाहायला मिळणार आहे.

मिळालेल्या माहितीनुसार, पुष्पा २ चित्रपट प्री-पोन करण्यात आला आहे. हा चित्रपट आता एक दिवस आधी प्रेक्षकांच्या भेटीला येणार आहे. हैदराबादमध्ये एका मोठ्या कार्यक्रमात चित्रपटाच्या निर्मात्याने चित्रपटाच्या प्रदर्शनाची नवी तारीख जाहीर केली. त्यानुसार पुष्पा २ चित्रपट ५ डिसेंबर रोजी चित्रपटगृहांमध्ये प्रदर्शित होणार आहे.

रिलीजच्या आधीच कोट्यवधींची कमाई

पुष्पा २ चित्रपटाने रिलीजच्या आधीच कोट्यवधींची कमाई केली आहे. आतापर्यंत या चित्रपटाने १०८५ कोटींचे प्री-रिलीझ कलेक्शन जमा केले आहे. डिसेंबरपर्यंत हा आकडा आणखी वाढून रेकॉर्डब्रेक कमाई करण्याची शक्यताही वर्तवण्यात येत आहे.