भारताचे पंतप्रधान नरेंद्र मोदी दोन दिवसीय ब्रुनेई दौऱ्यावर आहेत. नरेंद्र मोदी मंगळवारी ब्रुनेईची राजधानी बंदर सेरी बागवान येथे पोहोचले. दरम्यान, ब्रुनेई दौरा हा नरेंद्र मोदींचा खूप खास असल्याचे म्हंटल जात आहे.
भारतीय पंतप्रधानांनी ब्रुनेईला दिलेली ही प्रथमच भेट आहे. नरेंद्र मोदींनी दोन्ही देशांमधील राजनैतिक संबंधांना ४० वर्षे पूर्ण झाल्याबद्दल ब्रुनेईमधील भारतीय उच्चायुक्तालयाच्या नवीन कॅम्पसचे उद्घाटन केलं आहे.
नरेंद्र मोदींनी दोन्ही देशांमधील मजबूत संबंधांचे प्रतीक म्हणून उच्चायुक्तालयाचा उल्लेख केला. तसेच, याच्यामुळे अनिवासी भारतीयांची सेवा होईल. उच्चायुक्तालयाची इमारत कोटा दगडांनी बनलेली भारताचा समृद्ध सांस्कृतिक वारसा दर्शवते, असे नरेंद्र मोदी म्हणाले.
त्यानंतर, पंतप्रधान नरेंद्र मोदी राजधानीतील उमर अली सैफुद्दीन मशिदीत पोहोचले. ब्रुनेईच्या उमर अली सैफुद्दीन मशीद हे दोन राष्ट्रीय मशिदींपैकी एक आहे. यासोबत, ही ब्रुनेईचे राष्ट्रीय चिन्ह देखील आहे. देशातील सर्वात मोठ्या आणि जुन्या मशिदींपैकी ही मशीद आहे.
उमर अली सैफुद्दीन तृतीय यांच्या नावावरून या मशिदीचे नाव ठेवण्यात आले आहे. जे ब्रुनेईचे २८ वे सुलतान आणि सध्याचे सम्राट सुलतान हसनल बोल्किया यांचे वडील होते. देशातील इस्लामिक श्रद्धेचे प्रतीक म्हणून मानलं जाते.
मलेशियन आर्किटेक्चर फर्म बूटी एडवर्ड्स अँड पार्टनर्सने ही मशीद बांधली होती. या मशिदीच्या बांधकामात ७०० टन स्टील आणि १५०० टन काँक्रीटचा वापर करण्यात आला आहे. तसेच, मशिदीचा पाया ८०-१२ फूट खोल आहे.
ब्रुनेईतील या मशिदीचे उद्घाटन सुलतान उमर अली सैफुद्दीन तृतीय यांच्या ४२ व्या वाढदिवसादरम्यान १९५८ मध्ये करण्यात आले होते. भारतीय मुघल साम्राज्याशी मिळती-जुळती अशी मशिदीची रचना आहे.
दरवर्षी लाखो पर्यटक मशीद पाहण्यासाठी येतात. मशिदीच्या आकाराबद्दल बोलायचं तर ते ६९X२४ मीटर आहे. ३ हजार भाविक मशिदी एकत्र बसू शकतात. मशिदीची कमाल उंची १७१ फूट असून घुमट सोन्याने मढवलेला आहे.