तलवार आणि बेसबॉल बॅटसह, वाघनखे देखील केली जप्त
चंद्रपुरात वाढत्या गोळीबाराच्या पार्श्वभूमीवर पोलिसांनी टाकली धाड
चंद्रपूर : चंद्रपुरात गेल्या काही दिवसांत गोळीबाराच्या घटनांमध्ये वाढ (Chandrapur crime) झाली आहे. या पार्श्वभूमीवर पोलिसांनी शोधमोहिम सुरु केली आहे. त्यात एक धक्कादायक बातमी समोर आली आहे. चंद्रपुरात ठाकरे गटाचे (Thackeray Group) युवासेना जिल्हाप्रमुख विक्रांत सहारे (Vikrant Sahare) यांच्या घरात काडतुसांचा (Cartridges) साठा सापडल्याचा प्रकार समोर आला आहे. एवढंच नव्हे तर त्यांच्या घरात पोलिसांनी ४ तास केलेल्या छापेमारीत तलवार आणि बेसबॉल बॅटसह, वाघनखे देखील केली जप्त करण्यात आली आहेत.
मिळालेल्या माहितीनुसार, चंद्रपूर जिल्ह्यात गोळीबारांच्या घटनांत वाढ झाल्यामुळे पोलिसांनी अग्निशस्त्र व हत्यार विरोधी विशेष अभियान सुरु केले आहे. या अभियानांतर्गत सहारे यांना शस्त्रे विकण्यासाठी काही युवक येणार असल्याची गुप्त माहिती पोलिसांना मिळाली होती. त्यानुसार त्यांनी चंद्रपूर शहरातील इंदिरानगर भागातील विक्रांत सहारे यांच्या घरात ४ तास शोध अभियान राबवलं होतं.
विक्रांत सहारे यांच्या घरी ७.६५mm ची एकूण ४० काडतुसे सापडल्यामुळं पोलीस देखील चक्रावले आहेत. काडतुसांसह एक तलवार, १ मक्झिन आणि बेसबॉल बॅटसह, वाघनखे देखील जप्त करण्यात आली आहेत. सहारे यांच्यासह चंद्रपूर शहराच्या बाबूपेठ भागातील रहिवासी असलेल्या निलेश पराते आणि अमोल कोलतवार नामक २ तरुणांना देखील ताब्यात घेण्यात आले आहे. सहारे यांच्या अटकेमुळे जिल्ह्यातील राजकारणात खळबळ उडाली आहे. पुढील तपास रामनगर पोलीस करीत आहेत.
विक्रांत सहारे व कुटुंबियांची चौकशी सुरु
विक्रांत सहारे व कुटुंबियांची चौकशी केली जात आहे. स्वतः पोलीस अधीक्षक मुमक्का सुदर्शन आणि वरिष्ठ पोलीस अधिकाऱ्यांनी घटनास्थळी दाखल होत प्रकरणाची माहिती घेतली. एवढ्या मोठ्या संख्येत काडतुसे सापडल्यावर पोलिसांना ही काडतुसे वापरण्यासाठी आवश्यक असलेल्या शस्त्राचा माग काढावा लागणार आहे.