पाच तासांच्या प्रयत्नानंतर झाड हटविण्यास यश
मुरुड : पावसाने महाराष्ट्रात (Maharashtra Rain) जोर धरला असून अजूनही काही भागात मुसळधार पाऊस सुरुच आहे. मात्र अनेक ठिकाणी या पावसाचा जोरदार फटका बसत असल्याचे चित्र दिसून येत आहे. वाऱ्याच्या वेगासह आलेल्या पावसामुळे काही ठिकाणी इमारतीचा भाग कोसळत आहे तर अनेक ठिकाणी झाडे झुडुपही कोसळल्याच्या घटना घडत आहेत. अशातच आज पहाटे सहाच्या सुमारास मुरुड रोहा इंदापूर (Indapur) मार्गावर भलेमोठे वडाचे झाड (Banyan tree) कोसळल्याची (Collapsed) माहिती मिळत आहे.
मुरुड रोहा इंदापूर मार्गावरील खार आंबोली भागात शेकडो वर्षे जुने असलेले वडाचे झाड कोसळल्याने या मार्गावरून होणारी वाहतूक ठप्प झाली. त्यामुळे याठिकाणी रोह्याकडे जाणारी वाहतूक केळघर या पर्यायी मार्गावर तर इंदापूर, माणगाव, म्हसलाकडे जाणारी वाहने राजपुरी मार्गे वळविण्यात आली होती.
दरम्यान, घटनेची माहिती मिळताच सार्वजनिक बांधकाम विभाग, मुरुड नगरपरिषद प्रशासन दाखल झाले. तसेच स्थानिक ग्रामस्थ व दोन जेसीपीच्या मदतीने हे भले मोठे वडाचे झाड हटविण्याचे काम तातडीने सुरू करण्यात आले. जेसीपी व दोन कटर मशिनच्या सहाय्याने अवघ्या पाच तासांच्या प्रयत्नानंतर झाड हटविण्यास यश आले असून दुपारी साडेबाराच्या सुमारास हा मार्ग वाहतुकीसाठी खुला करण्यात आला.