रुग्णवाहिकेत दारुच्या बाटल्या आढळल्याने उडाली खळबळ
नाशिक : नाशिकमधून आज सकाळीच एक विचित्र अपघाताची घटना (Nashik Accident) समोर आली. यात एका मद्यधुंद अवस्थेत असलेल्या तरुणाने समोरुन येणाऱ्या महिलेच्या कारला धडक दिली. इतकंच नव्हे तर मदतीसाठी आलेल्या नागरिकांवरही त्याने दमदाटी केली. ही घटना ताजी असतानाच आता नाशिकमधून आणखी एक धक्कादायक घटना समोर आली आहे. ओझरजवळ (Ozar) एका खासगी रुग्णवाहिकेने (Ambulance) तीन वाहनांना धडक दिली. विशेष म्हणजे या रुग्णवाहिकेवर शिवसेना शिंदे गटाचे आमदार सुहास कांदे (Suhas Kande) यांचं नाव आणि फोटो होते.
याबाबत अधिक माहिती अशी की, नाशिक-धुळे महामार्गावर (Nashik-Dhule Highway) ओझरजवळ खासगी रुग्णवाहिकेने तीन वाहनांना धडक दिली. यात एका सरकारी रुग्णवाहिकेसह दोन वाहनांचा समावेश आहे. अपघातात सुदैवाने कोणतीही जीवितहानी झालेली नाही. मात्र वाहनांचे नुकसान झाले असून दोन जण जखमी झाले आहेत.
दरम्यान, यात एक खळबळजनक माहितीही समोर आली आहे. सदर रुग्णवाहिकेत दारूच्या बाटल्या आढळून आल्या. शिवाय रुग्णवाहिका चालक मद्यधुंद अवस्थेत असल्याचा स्थानिक नागरिकांनी आरोप केला आहे. या प्रकरणी सध्या पोलिसांचा तपास सुरु आहे.