६ जणांचा मृत्यू तर चार ते पाच जण गंभीर जखमी
नागपूर : डोंबिवली एमआयडीसी (Dombivali MIDC Fire) परिसरातील भीषण आगीची घटना ज्वलंत असतानाच नागपूरमध्येही मोठा स्फोट (Nagpur Blast) झाल्याची धक्कादायक माहिती मिळत आहे. नागपूरच्या धामणा येथील चामुंडा (Chamunda) कंपनीत हा स्फोट झाल्याची प्राथमिक माहिती समोर आली आहे. कंपनीमध्ये काम सुरू असताना अचानक स्फोट झाला. या स्फोटामध्ये मोठी जीवितहानी झाल्याची शक्यता वर्तवण्यात येत आहे. तर या भीषण स्फोटामुळे परिसरात एकच खळबळ उडाली आहे.
मिळालेल्या माहितीनुसार, हिंगणा तहसीलच्या धामणा येथील चामुंडा नावाच्या कंपनीत स्फोटकांशी संबंधित सर्व कामे केली जातात. आज दुपारी १च्या सुमारास पॅकेजिंग विभागात आग लागल्याची माहिती आली होती. त्यानंतर काही वेळातच या कंपनीमध्ये मोठा स्फोट झाला. ज्यावेळी स्फोट झाला त्यावेळी कंपनीमध्ये १० कामगार काम करत होते. हा स्फोट इतका भीषण होता की काम करणाऱ्या १० पैकी सहा जणांचा घटनास्थळीच मृत्यू झाला असून इतर चार ते पाच कामगार गंभीर जखमी झाले आहेत.
घटनेची माहिती मिळताच अग्निशमन दलाच्या गाड्या आणि हिंगणा पोलीस ठाण्याचे अधिकारी तत्काळ घटनास्थळी दाखल झाले. अग्निशमन दलाच्या जवानांकडून आग विझवण्याचे अथक प्रयत्न सुरु आहेत. जखमींना तातडीने नागपूर शहरातील खासगी रुग्णालयात दाखल करण्यात आले आहे. मात्र आग लागण्याचे कारण अद्यापही समोर आले नाही.