Nashik Accident : नाशिकमध्ये भीषण अपघात! बस आणि ट्रकची जोरदार धडक

एकाचा मृत्यू, ७ जण जखमी

नाशिक : राज्यभरात अपघाताच्या (Accident News) सत्रात सातत्याने वाढ होत असताना नाशिकमधूनही (Nashik) एक भीषण अपघाताची घटना उघडकीस आली आहे. नाशिक-छत्रपती संभाजीनगर महामार्गावर सकाळच्या सुमारास ट्रॅव्हल बस व ट्रक यांच्यात जोरदार धडक झाली. या भीषण अपघातात एकाचा जागीच मृत्यू झाला असून ७ जण गंभीर जखमी झाले आहेत. जखमींना रुग्णालयात उपचारासाठी दाखल करण्यात आले असून परिसरात एकच हळहळ व्यक्त करण्यात येत आहे.

मिळालेल्या माहितीनुसार, नाशिकच्या येवला तालुक्यातील देशमाने गावाजवळ हा भीषण अपघात झाला. जालना जिल्ह्यातील काही भाविक त्र्यंबकेश्वर येथे दर्शनासाठी गेले होते. बसमध्ये एकूण ६० प्रवासी प्रवास करत होते. दर्शनावरुन परत येताना देशमाने गावाजवळ हा अपघात झाला. चालकाचे नियंत्रण सुटल्यामुळे ट्रक आणि बस समोरासमोर धडक देऊन रस्त्याच्या कडेला शेतात घुसली. या दुर्घटनेत बस चालकाचा दुर्दैवी मृत्यू झाला असून इतर ७ जण गंभीर जखमी झाले आहेत. अपघातातील जखमींवर नजीकच्या रुग्णालयात उपचार सुरू आहेत.

दरम्यान, याबाबतची माहिती मिळताच स्थानिकांनी घटनास्थळी धाव घेत जखमींना मदत केली. जखमी झालेल्या रुग्णांना येवला येथील शासकीय उपजिल्हा रुग्णालयात उपचारासाठी दाखल करण्यात आले आहे.