Shrikant Shinde : ठरलं! कल्याणमधून श्रीकांत शिंदे हेच महायुतीचे उमेदवार

देवेंद्र फडणवीसांनी केली घोषणा

नागपूर : गेल्या अनेक दिवसांपासून चर्चेत असलेल्या कल्याणच्या (Kalyan) जागेवर अद्यापही महायुतीकडून (Mahayuti) उमेदवारीची घोषणा झाली नव्हती. भाजप व शिवसेना दोन्ही या जागेवर दावा करत असल्याने उमेदवार ठरत नव्हता. अखेर उपमुख्यमंत्री देवेंद्र फडणवीस (Devendra Fadnavis) यांनी याबाबत मोठी घोषणा केली आहे. कल्याणच्या जागेवर श्रीकांत शिंदे हेच महायुतीचे उमेदवार असतील, असं फडणवीस म्हणाले आहेत. नागपूर येथे भाजपच्या वर्धापन दिनानिमित्त आयोजित कार्यक्रमानंतर त्यांनी माध्यमांशी संवाद साधला.

देवेंद्र फडणवीस म्हणाले, श्रीकांत शिंदे यांना भारतीय जनता पक्षाकडून विरोध नाही. श्रीकांत शिंदे हे कल्याणमधून महायुतीचे उमेदवार असणार आहेत. भारतीय जनता पार्टी त्यांच्या पाठीमागे खंबीरपणे उभी राहणार आहे. आम्ही पूर्ण ताकदीने त्यांचा प्रचार करणार आहोत. मागच्या निवडणुकीपेक्षाही अधिक मताधिक्याने त्यांचा विजय होईल. आम्ही महायुतीतील भाजपा, राष्ट्रवादी, शिवसेना, रासपा, रिपाई असे सर्व घटकपक्ष त्यांना निवडवून आणण्यासाठी प्रयत्न करणार आहोत, असे देवेंद्र फडणवीस म्हणाले.

देवेंद्र फडणवीस यांच्या घोषणेनंतर आता कल्याणमध्ये श्रीकांत शिंदे विरुद्ध महाविकास आघाडीच्या उमेदवार वैशाली दरेकर यांच्यात लढत होईल, हे स्पष्ट झाले आहे.