LS 2024 : महायुतीनंतर मविआतही माढ्याचा तिढा कायम!

  53

महादेव जानकरांची शरद पवारांकडे माढा रासपला देण्याची मागणी


मुंबई : माढा मतदारसंघ महायुतीसाठी (Mahayuti) तणावाचा विषय ठरत असतानाच आता हाच मतदारसंघ मविआसाठीही (MVA) डोकेदुखी होऊन बसला आहे. माढ्यासाठी शरद पवारांची राष्ट्रवादी आग्रही असताना महादेव जानकरांनी (Mahadev Jankar) रासपसाठी तर जयंत पाटील (Jayant Patil) यांनी शेकापसाठी शरद पवारांकडे माढ्याची मागणी केली आहे. त्यामुळे लोकसभा निवडणुकीसाठी (LS 2024) माढा मतदारसंघ सध्या तरी राजकारणात चर्चेचा विषय बनला आहे.


राष्ट्रीय समाज पक्षाचे महादेव जानकर माढ्याच्या तिढ्यात पडले आहेत. भाजपने रणजितसिंह नाईक निंबाळकर यांना उमेदवारी दिल्यावरून अकलूज येथील मोहिते पाटील परिवार कमालीचा नाराज झाला आहे. मोहिते पाटील वेट अँड वॉचच्या भूमिकेत असताना, महादेव जानकर यांनी माढ्याचा तिढा आणखीन वाढवला आहे. माढा लोकसभा मतदार संघाची जागा महाविकास आघाडीने रासपला द्यावी, अशी मागणी महादेव जानकर यांनी केली आहे.


महादेव जानकर यांनी देवेंद्र फडणवीसांची देखील भेट घेतल्याची प्राथमिक माहिती समोर येत आहे. मोहिते पाटील आणि रणजित सिंह नाईक निंबाळकर यांच्यात रस्सीखेच सुरू असताना शेकाप आणि रासपने माढ्याच्या जागेवर उमेदवार देण्याची मागणी केली आहे.


भारतीय जनता पार्टीच्या केंद्रीय समितीने वीस जणांची यादी जाहीर करताच माढ्याचा तिढा वाढला आहे. मोहिते पाटील यांनी बंडाचा झेंडा हाती घेतला आहे. रणजितसिंह नाईक निंबाळकर यांचं नाव वीस जणांच्या यादीत आलं आणि धैर्यशील मोहिते पाटील यांचा पत्ता कट झाला. धैर्यशील मोहिते पाटील यांचा पत्ता कट झाल्याने रविवारी दिवसभर अकलूज येथील शिवरत्न बंगल्यात बैठकी झाल्या. राज्याचे ग्रामविकास मंत्री गिरीश महाजन यांनी देखील शिवरत्न बंगल्यात जाऊन मोहिते पाटील परिवाराची समजूत घालण्याचा प्रयत्न केला. मात्र, धैर्यशील पाटील यांनी बंडाचा झेंडा कायम ठेवत अप्रत्यक्षपणे प्रचाराला सुरुवात केली आहे. त्यांनी करमाळा विधानसभा मतदारसंघातून मंगळवारपासून गावभेटी सुरू केल्या आहेत.



शेकापनेही केली माढ्याची मागणी


शेकापचे ज्येष्ठ नेते जयंत पाटील यांनी शरद पवारांची भेट घेत महाविकास आघाडीकडून दिवंगत माजी आमदार गणपत राव देशमुख यांचे नातू डॉ. अनिकेत देशमुख यांना उमेदवारी द्यावी, अशी मागणी केली. जयंत पाटील यांनी अधिकृतपणे माध्यमांना माहिती दिली आहे. बुधवारी सकाळी राष्ट्रीय समाज पक्षाचे महादेव जानकर यांनी शरद पवारांची भेट घेत माढा लोकसभेत रासपच्या उमेदवाराला उमेदवारी द्या, अशी मागणी करत रासपचा दावा ठोकला आहे. मोहिते पाटील आणि निंबाळकर यांच्यातील तिढा अजून सुटलेला नसताना महादेव जानकर यांनी माढ्याच्या तिढ्यात उडी घेतली आहे.

Comments
Add Comment

महादेवी हत्तिणीला ‘वनतारा’मध्ये पाठवण्याबाबतचा अहवाल

पेटा संस्थेमार्फत सत्यपरिस्थिती नमूद कोल्हापूर : महादेवी या हत्तिणीला कोल्हापूर मधील एका मठातून वनतारा येथे

हुंड्याऐवजी मुलींसाठी फिक्स डिपॉझिट

मराठा समाजाची लग्न आचारसंहिता अहिल्यानगर : पुण्यातील वैष्णवी हगवणे आत्महत्याप्रकरणानंतर मराठा समाजातील

डॉक्टरांसाठी ‘क्यूआर कोड’ प्रणाली अनिवार्य

बोगस डॉक्टरांना बसणार आळा पुणे : राज्यातील बोगस डॉक्टरांच्या वाढत्या प्रकरणांना आळा घालण्यासाठी आता

भाऊरायांना राखी पाठवण्यासाठी पोस्ट ऑफिस सज्ज, पावसाची चिंता मिटली; राखीसाठी वॉटरप्रूफ लिफाफा

पुणे (वार्ताहर) : दूरगावी असणाऱ्या भावाला आपली प्रेमाची राखी पाठविण्यासाठी सध्या बहिणींची लगबग सुरू आहे. तसेच

शेतीचा दर्जा दिल्याने मत्स्यव्यवसाय प्राधान्याचे क्षेत्र : मुख्यमंत्री देवेंद्र फडणवीस

अमरावती : मत्स्य व्यवसायाला चालना देण्यासाठी राज्य शासन विविध प्रयत्न करीत आहेत. यातील सर्वात महत्त्वाचा भाग

नितीन गडकरी यांच्या घराला बॉम्बने उडवण्याची धमकी; आरोपी ताब्यात

नागपूर:  केंद्रीय रस्ते वाहतूक मंत्री नितीन गडकरी यांच्या महाल येथील निर्मानाधीन निवासस्थान बॉम्बने उडवण्याची