आज मुख्यमंत्र्यांच्या उपस्थितीत वर्षा बंगल्यावर होणार जाहीर पक्षप्रवेश
मुंबई : लोकसभा निवडणुकांच्या (Loksabha Election) तयारीत सर्व राजकीय पक्ष (Political parties) गुंतलेले असतानाच महाविकास आघाडीला (MVA) मात्र ऐन निवडणुकांच्या वेळी पक्ष सोडून चाललेल्या आपल्या नेत्यांची चिंता करावी लागत आहे. शरद पवार आणि उद्धव ठाकरे यांची साथ सोडून अनेक नेते महायुतीमध्ये सामील होत आहेत. या पार्श्वभूमीवर ठाकरे गटाला आणखी एक मोठा धक्का पचवावा लागणार आहे. याचं कारण म्हणजे ठाकरे गटाचे आमदार, अत्यंत निष्ठावान नेते आणि उद्धव ठाकरे (Uddhav Thackeray) यांचे निकटवर्तीय रवींद्र वायकर (Ravindra Waikar) मुख्यमंत्री एकनाथ शिंदे (CM Eknath Shinde) यांची कास धरणार आहेत. हा मोठा मासा शिंदेंच्या गळाला लागल्याने ठाकरे गट आणखी कमकुवत होणार आहे.
आमदार रवींद्र वायकर आज शिवसेनेत (Shivsena) जाहीर प्रवेश करणार आहेत. मुख्यमंत्री एकनाथ शिंदे यांच्या उपस्थितीत मुख्यमंत्र्यांचं निवासस्थान असलेल्या वर्षा बंगल्यावर रवींद्र वायकर यांचा पक्षप्रवेश होणार आहे. दरम्यान, गेल्या अनेक दिवसांपासून रवींद्र वायकर शिवसेनेत प्रवेश करणार असल्याचं बोललं जात होतं. अखेर त्यांच्या पक्षप्रवेशाला मुहुर्त सापडला असून लवकरच ते एकनाथ शिंदेंची साथ देताना दिसणार आहेत.
गेल्या काही दिवसांपासून ठाकरे गटातील आणखी एक आमदार शिंदेंच्या गळाला लागल्याची चर्चा होती. या आमदाराने एकनाथ शिंदे यांची गुप्तपणे भेट घेतल्याचीही चर्चा होती. मात्र, हा आमदार नेमका कोण, हे समजू शकले नव्हते. हा आमदार रवींद्र वायकर असल्याची माहिती समोर येत आहे. रवींद्र वायकर आणि मुख्यमंत्री शिंदे यांच्यात गुप्त बैठक पार पडली. या बैठकीत रवींद्र वायकर यांनी एकनाथ शिंदे यांच्यासोबत काम करण्याची इच्छा व्यक्त केली. आम्ही मुळचे शिवसैनिक आहोत, धनुष्यबाणाचे पाईक आहोत. त्यामुळे आगामी लोकसभा निवडणुकीत आम्हाला तुमच्या खांद्याला खांदा लावून लढायचे आहे, असे वायकरांनी एकनाथ शिंदे यांना सांगितल्याचे समजते.
रवींद्र वायकर यांच्यासोबत स्थानिक शिवसैनिकही शिंदे गटात जाण्याची शक्यता आहे. वायकर यांनी सर्व नगरसेवक, शाखा प्रमुख, विभाग प्रमुखांना तयारीत राहण्याचे आदेश दिल्याची माहिती मिळाली आहे.
कोण आहेत रवींद्र वायकर?
जोगेश्वरी भागातून १९९२ मध्ये रवींद्र वायकर पहिल्यांदा मुंबई महानगरपालिकेवर निवडून आले. २००६-२०१० या काळात वायकर यांनी मुंबई महानगरपालिकेच्या स्थायी समितीचे अध्यक्ष म्हणूनही काम पाहिले होते. त्यानंतर २००९, २०१४ आणि २०१९ मध्ये सलग तीनवेळा जोगेश्वरी पूर्व विधानसभा मतदारसंघातून वायकर आमदार म्हणून निवडून आले. महाविकास आघाडी सरकारमध्ये रवींद्र वायकर यांच्याकडे गृहनिर्माण आणि उच्च व तंत्रशिक्षण विभागाच्या राज्यमंत्रीपदाची धुरा होती. त्यानंतर २०१९च्या महाविकास आघाडी सरकारमध्ये वायकर गृहनिर्माण विभागाचे राज्यमंत्री होते.