मुंबई : मराठी आणि हिंदी मनोरंजन विश्वात आपल्या उत्तम अभिनयाचा ठसा उमटवणाऱ्या ज्येष्ठ अभिनेत्री सीमा देव (Seema Dev) यांचे दिर्घ आजाराने निधन झाले. त्या ८१ व्या वर्षांच्या होत्या.
सीमा देव यांनी मराठी आणि हिंदी सिनेमात उल्लेखनीय काम केले आहे. त्यांनी जवळपास ८० हिंदी आणि मराठी सिनेमांमध्ये काम केले.
ज्येष्ठ अभिनेते रमेश देव (Ramesh Deo) यांच्याशी १९६२ मध्ये अभिनेत्री नलिनी सराफ (सीमा देव) यांनी लग्न केले होते. या दोघांनीही अनेक चित्रपटांत सोबत काम केले. गेल्यावर्षी २ फेब्रुवारी २०२२ रोजी गुणी अभिनेते अशी ओळख असलेले रमेश देव यांचे आज हृदयविकाराच्या झटक्याने वयाच्या ९३व्या वर्षी निधन झाले. ऑनस्क्रीन तसेच ऑफस्क्रीन या दोघांची केमिस्ट्री कायमच चर्चिली गेली.
१९५७ साली ‘आलिया भोगासी’ या मराठी चित्रपटाद्वारे सीमा देव यांनी मनोरंजन विश्वात पदार्पण केले. सीमा देव यांनी १९६० मध्ये जगाच्या पाठीवर या मराठी चित्रपटात रमेश देव यांच्यासोबत भूमिका साकारली होती. या जोडीमुळे 'जगाच्या पाठीवर' हा चित्रपट चांगलाच गाजला. त्यावेळी हा चित्रपट 'ब्लॉकबस्टर' ठरला होता. त्यांच्या ‘सुवासिनी’, ‘आनंद’ अशा अनेक चित्रपटांमधील भूमिका विशेष गाजल्या.
त्यांचा मुलगा अजिंक्य देवही प्रसिध्द अभिनेता आहे.
‘सरस्वतीचंद्र’ (१९६८), ‘आनंद’ आणि ‘ड्रीम गर्ल’ (१९७७) या हिंदी चित्रपटांमध्येही सीमा देव यांनी काम केले आहे. त्यांच्या निधनाच्या बातमीने मनोरंजन विश्वावर शोककळा पसरली आहे.