अहमदाबाद: पंतप्रधान नरेंद्र मोदी (PM Narendra Modi) आणि उत्तर प्रदेशचे मुख्यमंत्री योगी आदित्यनाथ (UP CM Yogi Adityanath) यांच्या आधारकार्डसोबत छेडछाड करण्याचा प्रयत्न केल्याचे समोर आले आहे. बिहारमधील मुजफ्फरपूर येथे एका तरुणाला या प्रकरणी अटक करण्यात आली आहे. आरोपीने मुख्यमंत्री आणि पंतप्रधान यांच्या जन्मतारखेमध्ये बदल केला होता. तसेच बदल केलेल्या आधारकार्डचा चूकीचा वापर देखील करण्यात आल्याचे समोर आले आहे.
दरम्यान, अहमदाबाद येथून सायबर पोलिसांचं पथक बिहारला गेले आणि बिहार पोलिसांसोबत कामगिरी करत अर्पण दुबे याला बेड्या ठोकल्या. अहमदाबाद पोलीस पुढील तपास करत आहेत. आरोपीच्या वडिलांचे म्हणणे आहे की, अर्पण निर्दोष आहे. त्यांच्या मुलाविरुद्ध यापूर्वी कोणताही गुन्हा दाखल झालेला नाही. तो अभ्यासातही चांगला आहे. दरम्यान, अटक करण्यात आलेला तरुण अर्पण दुबे हा अर्थशास्त्र विषयात पदवीच्या शेवटच्या वर्षात शिक्षण घेत आहे. अर्पण याने कॉम्पुटर डिप्लोमाचा कोर्सही केलेला आहे.