नाशिक : मागील महिन्यात जिल्ह्यातील १४ बाजार समित्यांच्या निवडणुका पार पडल्या. या सर्वात नाशिक बाजार समिती निवडणूक चांगलीच चर्चेत राहिली. आरोप-प्रत्यारोपांनी गाजलेल्या आणि अवघ्या जिल्ह्याचे नव्हे तर राज्याचे लक्ष वेधलेल्या नाशिक कृषी उत्पन्न बाजार समितीच्या निवडणुकीचा निकाल जाहीर झाला आहे.
सभापती आणि उपसभापतीपदाच्या निवडणुकीत विरोधी चुंभळे गटाने ऐनवेळी माघार घेतल्याने सत्ताधारी गटाचे देविदास पिंगळे यांची सभापतीपदी तर उत्तमराव खांडबहाले यांची उपसभापतीपदी बिनविरोध निवड झाली.
काही संचालकांवर असलेली अपात्रतेची टांगती तलवार व न्यायालयीन कारवाईच्या पार्श्वभूमीवर सभापती पदाच्या निवडणुकीकडे साऱ्यांचे लक्ष लागून होते. तसेच संचालक फुटीच्या भितीतून देविदास पिंगळे व शिवाजी चुंभळे दोन्ही गटांनी आपल्या समर्थक संचालकांना गेल्या काही दिवसांपासून अज्ञातस्थळी रवाना केले होते. सभापती पदाच्या निवडणुकीसाठी हे संचालक शुक्रवारी परतीच्या प्रवासाला असल्याचे सांगण्यात आले. निवडणुकीच्या पार्श्वभूमीवर कायदा व सुव्यवस्थेचा प्रश्न निर्माण होऊ नये म्हणून सुमारे ४० पोलिसांचा बंदोबस्त तैनात करण्यात आला होता.
दरम्यान विरोधी चुंभळे गटाने अर्ज दाखल न करता नूतन सभापती, उपसभापती यांचे अभिनंदन केले. गेल्या ३० वर्षांत भ्रष्टाचारमुक्त कारभार केल्यामुळे पुन्हा सत्तापदी राहण्याची संधी मिळाली, अशी प्रतिक्रिया देविदास पिंगळेंनी व्यक्त केली. तर भ्रष्टाचारमुक्त कारभारासोबत शेतकर्यांचे हित जोपासणेदेखील गरजेचे आहे, शेतकरीहितासाठी विरोधात बसून काम करु, असे विरोधी गटाचे शिवाजी चुंभळे म्हणाले. निवडणूक निर्णय अधिकारी तथा उपजिल्हाधिकारी नितिनकुमार मुंडावरे यांच्या अध्यक्षतेखाली पार पडली.
