पनवेल : खारघर आणि परिसरात अतिक्रमणांचा सुळसुळाट झाला आहे. यातून फुटपाथही सुटलेले नाहीत. काही ठिकाणी बांधकाम व्यावसायिकांनी कार्यालये थाटली आहेत. मात्र पनवेल महापालिकेचा अतिक्रमण विभाग त्यावर कारवाई करत नसल्यामुळे नागरिकांमध्ये नाराजी आहे.
खारघर नोड हा मोठा परिसर आहे. तेथे अतिक्रमणांचा सुळसुळाट झाला आहे. पनवेल पालिकेचा अतिक्रमण विभाग तात्पूरती कारवाई करतो. त्यातही बड्यांच्या अतिक्रमणांवर कारवाई केली जात नाही, असा आरोप येथील नागरिक करतात. सेक्टर १६ येथे फुटपाथवर अतिक्रमण करून बांधकाम व्यावसायिकाने कार्यालय थाटले आहे. युफोरिया सहकारी गृहनिर्माण संस्थेनेही फुटपाथवर कार्यालय थाटले आहे. सेक्टर ३४ मध्ये पेठ गावाजवळ निळकंठ ग्रुपचे कार्यालयही फुटपाथवर आहे. त्यामुळे फुटपाथ नागरिकांना ये-जा करण्यासाठी आहे की अतिक्रमण करणारांसाठी असा प्रश्न निर्माण झाला आहे.
फुटपाथवर ही अतिक्रमणे होईपर्यंत पालिकेचा अतिक्रमण विभाग काय करत होता, असा सवाल उपस्थित झाला आहे. पनवेल शहर व परिसरात मोठ्या प्रमाणात अतिक्रमणे होत असल्याने पालिका आयुक्त काय भूमिका घेतात हे पाहणे औत्सुक्याचे ठरणार आहे. खारघर येथील अतिक्रमण विभागाचे जितेंद्र मढवी यांना याबाबत विचारले असता त्यांनी पाच जणांना नोटिसा दिल्या असल्याचे सांगितले. ही अतिक्रमणे काढण्यासाठी सात दिवसांची मुदत आहे. त्यात त्यांनी स्वतःहून ती हटवली नाहीत तर पालिका ती हटवेल, असे सांगितले.