मुंबई (प्रतिनिधी) : मुंबई शेअर बाजाराचा निर्देशांक सेन्सेक्समध्ये ८७२ अंकांची घसरण झाली आहे. तर राष्ट्रीय शेअर बाजाराचा निर्देशांक निफ्टीमध्ये २६७ अंकांची घसरण झाली.
शेअर बाजारातील आठवड्याची सुरुवात मोठ्या घसरणीने झाल्याने गुंतवणूकदारांना मोठे नुकसान सहन करावे लागले आहे. शेअर बाजारात सोमवारी सलग दुसऱ्या सत्रात घसरण झाली असून सेन्सेक्समध्ये १.४६ टक्क्यांची घसरण झाली असून तो ५८,७७३ अंकांवर पोहोचला. तर निफ्टीमध्ये १.५१ टक्क्यांची घसरण झाली असून तो १७,४९० अंकांवर पोहोचला. बँक निफ्टीमध्येही ६८८ अंकांची घसरण झाली असून तो ३८,२९७ अंकांवर पोहोचला आहे.
सोमवारी शेअर बाजारामध्ये १२२८ कंपन्यांच्या शेअर्समध्ये वाढ झाली तर २२१४ कंपन्यांच्या शेअर्समध्ये घट झाली. आज १६३ कंपन्यांच्या शेअर्समध्ये कोणताही बदल झालेला नाही. गेल्या दोन सत्रातील घसरणीमुळे गुंतवणूकदारांचे मात्र ६.५ लाख कोटी रुपयांचे नुकसान झाल्याचे दिसून येते आहे. दरम्यान डॉलरच्या तुलनेत सोमवारी रुपयाच्या किमतीत ९ पैशांची घसरण झाली असून रुपयाची किंमत ७९.८७ इतकी आहे.