कणकवली न.पं.ला वातानुकूलित शवपेटी

नितेश राणे यांचा पाठपुरावा

कणकवली (प्रतिनिधी) : आमदार नितेश राणे यांच्या पाठपुराव्यातून कणकवली नगरपंचायतला भाजप ओबीसी मोर्चाचे अध्यक्ष नरेंद्र गावकर व सचिव विजय घरत यांच्या माध्यमातून वातानुकूलित शवपेटी नगराध्यक्ष समीर नलावडे यांच्याकडे सुपूर्द करण्यात आली. कणकवली नगरपंचायतला ही सुविधा उपलब्ध करून दिल्याबद्दल नगराध्यक्ष समीर नलावडे यांनी गावकर व घरत यांचे आभार व्यक्त केले. अंत्यसंस्कार झाल्यानंतर ही शवपेटी पुन्हा नगरपंचायत जवळ उपलब्ध राहणार असल्याची माहिती नगराध्यक्ष समीर नलावडे यांनी दिली.

नगराध्यक्ष समीर नलावडे यांनी शवपेटीची मागणी आमदार नितेश राणे यांच्याकडे केली होती. त्यानंतर आमदार नितेश राणे यांनी या संदर्भात नगराध्यक्ष समीर नलावडे यांना शब्द दिला होता. कणकवली उपजिल्हा रुग्णालयात दोनच शवपेट्या असल्याने अनेकदा नागरिकांना ताटकळत राहावे लागते. यावेळी उपनगराध्यक्ष बंडू हर्णे, गटनेते संजय कामतेकर, नगरसेवक मेघा गांगण, अभिजित मुसळे, रवींद्र गायकवाड, कविता राणे, प्रतीक्षा सावंत, मेघा सावंत, शिशिर परुळेकर, शहराध्यक्ष आण्णा कोदे आदी उपस्थित होते.