नवी दिल्ली (वृत्तसंस्था) : भारतीय संघाचा स्टार फलंदाज सूर्यकुमार यादवने आयसीसीच्या टी-२० क्रमवारीत आपले अव्वल स्थान कायम ठेवले आहे. मात्र त्याच्या रेटिंगमध्ये काहीशी घसरण झाली आहे.
बुधवारी आयसीसीने टी-२० फलंदाजांची क्रमवारी जाहीर केली. त्यानुसार सूर्यकुमार यादवने आपले अव्वल स्थान टिकवले आहे. न्यूझीलंडविरुद्धच्या टी-२० मालिकेतील पहिल्या सामन्यात, सूर्यकुमार यादवने ४७ धावांची खेळी खेळून आपल्या क्रमवारीत ९१० रेटिंग गुण मिळवले होते, हे रॅकिंग सूर्याच्या आतापर्यंतच्या टी-२० आंतरराष्ट्रीय कारकिर्दीतील सर्वोत्तम रॅकिंग आहे. लखनऊमध्ये न्यूझीलंडविरुद्ध खेळल्या गेलेल्या दुसऱ्या टी-२० सामन्यानंतर सूर्याच्या रेटिंगमध्ये काहीशी घसरण झाली. दुसऱ्या सामन्यात त्याने २६ धावांची नाबाद खेळी खेळली. त्यानंतर रँकिंगमध्ये तो पहिल्या क्रमांकावर राहिला खरा, परंतु त्याचे रेटिंग ९१० वरून ९०८ पर्यंत घसरले. टी-२० आंतरराष्ट्रीय, इंग्लिश क्रिकेटच्या इतिहासात आतापर्यंत डेव्हिड मलानने आयसीसी क्रमवारीत सर्वाधिक ९१५ रेटिंग मिळवले आहे. मलानने २०२०मध्ये हे रेटिंग मिळवले होते. तेव्हापासून आतापर्यंत मलानच्या रेटिंगची बरोबरी कोणी करू शकलेले नाही.