ठाणे (वार्ताहर) : ठाणे जिल्हा कबड्डी असोशिएसनच्या मान्यतेने जय महाराष्ट्र माथाडी आणि जनरल कामगार सेना ठाणे यांच्या वतीने ४ ते ९ फेब्रुवारी या कालावधीत ‘मुख्यमंत्री चषक’ कबड्डी स्पर्धेचे आयोजन करण्यात आले आहे. पुरुष प्रथम व द्वितीय श्रेणी, महिला, कुमार- कुमारी अशा ५ विविध गटात तसेच १४ वर्षांखालील व १७ वर्षांखालील मुले व मुली असे एकूण ९ विविध गटात स्पर्धा घेण्यात येणार आहे. छत्रपती शिवाजी महाराज मैदान, ठाणे (पश्चिम) येथे होणाऱ्या या स्पर्धेत २३००पेक्षा अधिक खेळाडू सहभागी होणार आहेत. प्रथम व द्वितीय श्रेणी या दोन्ही गटात प्रत्येकी ३२ संघांनी सहभाग नोंदविला आहे. महिला गटात १९, कुमार गटात २१, तर कुमारी गटात १४ संघांचा सहभाग आहे. १४ वर्षांखालील मुलांच्या गटात १६, तर मुलींच्या गटात १३ संघांना सहभाग देण्यात आला आहे. १७ वर्षांखालील मुलांच्या २१, तर मुलींच्या १० संघांनी भाग घेतला आहे. स्पर्धेत विजयी होणाऱ्या संघांना सात लाख रुपयांच्या पारितोषिकासह आकर्षक चषक देऊन गौरविण्यात येणार आहे
स्पर्धेचे उद्घाटन शनिवार ४ फेब्रुवारीला सकाळी ९ वाजता करण्यात येणार आहे. आंतर शालेय स्पर्धा ४ व ५ फेब्रुवारी रोजी सकाळी ९ ते सायंकाळी ५ या वेळेत खेळविण्यात येईल. उपांत्य व अंतिम फेरीचे सामने ९ फेब्रुवारी रोजी सायं. ५ वाजता खेळविण्यात येतील. सर्व जिल्हास्तरीय गटाचे सामने दि. ४ फेब्रुवारी पासून सायं. ६ ते रात्री १० या वेळेत खेळविण्यात येतील.