मुंबई : लोकलमध्ये कर्तव्यावर असलेल्या होमगार्डने रेल्वे कर्मचाऱ्याला लाथ मारल्याचा प्रकार घडला. ही घटना सीसीटीव्ही कॅमेऱ्यात कैद झाली असून, लाथ मारल्याचा व्हीडिओ सोशल मीडियावर व्हायरल होत आहे. पश्चिम रेल्वेवर मंगळवारी चर्चगेट-बोरिवली लोकल रात्री ९:३० वाजता विलेपार्ले स्थानकावर ही धक्कादायक घटना घडली.
चर्चगेट-बोरिवली या लोकलमध्ये गार्ड चैतन्य मालवदे कर्तव्यावर होते. ही लोकल दादर येथे येईपर्यंत महिला डब्यात एकही गृहरक्षक नव्हता. लोकल दादर स्थानकावर आल्यानंतर १ गृहरक्षक महिला डब्यात चढला. तर वांद्रे स्थानकात ३ गृहरक्षक महिला डब्यात चढले. हे चारही गृहरक्षक महिला डब्याच्या दरवाजाजवळ उभे असल्याने लोकलमध्ये चढताना महिला प्रवाशांना त्रास होत होता. म्हणून चैतन्य मालवदे यांनी गृहरक्षकांना लोकल डब्यातून उतरण्यास विनंती केली. पण त्यांनी उतरण्यास नकार दिला. लोकल विलेपार्ले येथे पोहोचताच गृहरक्षक मनोज सावंत हा महिला डब्ब्यातून खाली उतरला आणि गार्ड चैतन्य मालवदे यांना शिवागाळ करत लाथ मारली.
रेल्वे कर्मचारी संघटना आक्रमक
या संतप्त घटनेनंतर रेल्वे पोलिसांनी याप्रकरणी गुन्हा दाखल करावा, अशी मागणी रेल्वे कर्मचारी संघटना यांनी केली. ही घटना सीसीटीव्ही कॅमेऱ्यात कैद झाल्यामुळे सध्या पोलिसांचा तपास सुरू आहे. मात्र या घटनेनंतर रेल्वे कर्मचारी संघटना आक्रमक झाली असून, कर्मचाऱ्यांमध्ये संतापाची लाट आहे. साधारण २२ लोकल गार्ड बुधवारी गुन्हा नोंदवण्याच्या मागणीसाठी अंधेरी रेल्वे पोलीस ठाण्यात जमले होते. फक्त अदखलपात्र (एनसी) गुन्ह्याची नोंद करण्यात आली. दुसरीकडे महिला प्रवाशांच्या डब्यात एकाचवेळी गृहरक्षक, रेल्वे पोलीस, महाराष्ट्र सुरक्षा बलाचे कर्मचारी तैनात असतात. यामुळे महिला प्रवाशांना प्रवास करणे कठीण होते, असे बोलले जाते.
