वॉशिंग्टन डीसी : ताज्या हल्ल्यात इराणची किमान नऊ जहाजं बुडवण्यात यश मिळाल्याचा दावा अमेरिकेचे अध्यक्ष डोनाल्ड ट्रम्प यांनी ट्रुथ या सोशल मीडिया प्लॅटफॉर्मवरुन केला आहे. बुडवलेल्या जहाजांपैकी काही तुलनेने मोठी आणि महत्त्वाची आहेत; असेही ट्रम्पनी सांगितले. इराणच्या नौदलाच्या मुख्यालयाचे अंशतः नुकसान करण्यात अमेरिका यशस्वी झाल्याचाही दावाही ट्रम्प यांनी केला आहे. याआधी सेंट्रल कमांडने (सेंटकॉम) ओमानच्या आखातातील एका बंदरात इराणी युद्धनौका बुडवल्याचे जाहीर केले आहे.
इराणच्या काही जहाजांचा पाठलाग अमेरिका करत आहे. लवकरच इराणची आणखी काही जहाजं समुद्रतळाशी असतील, असा विश्वास ट्रम्प यांनी व्यक्त केला आहे. ट्रम्प यांच्या या दाव्यावर अद्याप इराणची प्रतिक्रिया समजलेली नाही.
अमेरिका आणि इस्रायल यांच्या संयुक्त हवाई हल्ल्यात इराणचे किमान ४८ महत्त्वाचे नेते मारले गेले आहेत. हा इराणसाठी मोठा धक्का असल्याचा दावा ट्रम्प यांनी केला आहे. इराण विरूद्धच्या लष्करी कारवाईला मोठे यश मिळत असल्याचे ट्रम्प यांनी फॉक्स न्यूज या अमेरिकेतील वृत्तवाहिनीला सांगितले. इराणमध्ये नेतृत्व बदल करणे आणि इराणचे सैन्यबळ नष्ट करणे, इराणकडे असलेले आण्विक सामर्थ्य निकामी करणे हाच अमेरिका आणि इस्रायलच्या हल्ल्याचा मुख्य हेतू आहे, अशी माहिती ट्रम्प यांनी फॉक्स न्यूज या अमेरिकेतील वृत्तवाहिनीला दिली. जगात शांतता नांदावी तसेच जगाची सुरक्षा अबाधित रहावी यासाठी इराण विरुद्धची कारवाई आवश्यक असल्याचे ट्रम्प यांनी सांगितले.
