जम्मू-काश्मीरची राजधानी श्रीनगर येथे सीआरपीएफच्या जवानांना घेऊन जाणारे बुलेटप्रूफ बंकर वाहन कालव्यामध्ये कोसळल्याची गंभीर घटना घडली आहे. या अपघातात सेंट्रल रिजर्व पुलिस फोर्स म्हणजेच सीआरपीएफ (CRPF) च्या २१व्या बटालियनमधील सात जवान जखमी झाले असून त्यांची प्रकृती सध्या स्थिर असल्याची माहिती प्रशासनाने दिली आहे.
कसा झाला अपघात ?
ही घटना शनिवार २१ फेब्रुवारी रोजी शहरातील अहमद नगर परिसरात दागपोरा रोडवरील उमर हेयर येथे घडली. नियमित गस्तीवर असलेले सीआरपीएफचे बंकर वाहन अहमद नगर भागात पोहोचताच चालकाचा वाहनावरील ताबा सुटल्याचे सांगितले जात आहे. प्रत्यक्षदर्शींनी दिलेल्या माहितीनुसार, वाहनाचा वेग आणि रस्त्याची स्थिती यामुळे वाहन घसरले आणि थेट रस्त्यालगत असलेल्या कालव्यामध्ये जाऊन पडले. अपघातानंतर परिसरात काही काळ गोंधळाचे वातावरण निर्माण झाले होते.
स्थानिकांकडून बचावकार्य सुरु :
घटना घडताच स्थानिक नागरिकांनी तत्परता आणि धाडस दाखवत बचावकार्य सुरू केले. कालव्यामध्ये कोसळलेल्या वाहनात अडकलेल्या जवानांना बाहेर काढण्यासाठी त्यांनी मोठी मदत केली. काही वेळाच्या प्रयत्नांनंतर सातही जखमी जवानांना सुरक्षित बाहेर काढण्यात यश आले. त्यानंतर त्यांना तातडीने उपचारासाठी शेर-ए-कश्मीर इंस्टीट्यूट ऑफ मेडिकल साइंसेज (SKIMS) रुग्णालयात दाखल करण्यात आले. नगिंदर सिंह (३६), अजित कुमार राम (३६), राज किशोर राय (४०), अमित कुमार यादव (३८), राजधन राम (५५), मानकर कुमार (४०) आणि नीरज कुमार (४५) अशी जखमींची नावे आहेत.
रुग्णालयातील वरिष्ठ डॉक्टरांनी दिलेल्या माहितीनुसार, जवानांना काही प्रमाणात दुखापती झाल्या असल्या तरी त्या गंभीर नाहीत. सर्वांची प्रकृती स्थिर असून वैद्यकीय पथक त्यांच्या प्रकृतीवर बारकाईने लक्ष ठेवून आहे.
दरम्यान, या अपघाताबाबत सखोल चौकशीचे आदेश देण्यात आले आहेत. तांत्रिक बिघाड, चालकाची चूक किंवा इतर कोणतेही कारण यामागे आहे का, याचा तपास केला जाणार आहे. सुरक्षा यंत्रणांनी घटनास्थळी बंदोबस्त वाढवला असून पुढील अहवालाची प्रतीक्षा आहे.
